mánudagur, 16. nóvember 2020

Risarækjur með tómata- og pestósósu

Vá. Þvílík dásemd sem þessi réttur var. 

Átti svo yndislegt nýbakað súrdeigsbrauð sem ég vildi nota til þess að drekka upp gómsæta sósu og datt í hug að búa til einhvernskonar rétt úr risarækjum sem ég átti til. 
Að öllu jöfnu hefði ég gert þennan rétt hérna sem ég geri afskaplega oft en það var eitthvað svo kuldalegt úti að mig langaði í kraftmikla og braðgmikla rjómasósu. 

Uppskrift:

 fyrir um 2 

ca 400 gr risarækjur 
3 msk olía 
200 gr kokteiltómatar 
5 sneiðar sólþurrkaðir tómatar skorið í teninga
2 hvítlausrif 
1 skarlottulaukur 
100 ml hvítvín 
1 msk rautt pestó (Philipo Berio)
1 msk fljótandi humarkraftur frá Oscars
200 ml rjómi 
fersk basilika, ca 10 blöð
rifinn parmesan (hver og einn setur yfir) 
salt og pipar 

Aðferð

  • Steikið rækjurnar uppúr 2 msk af olíu á heitri pönnu. Takið af og látið til hliðar 
  • Steikið því næst saxaðan hvítlauk, skarlottulauk, kokteiltómata, sólþurrkaða tómata í ca 3 mín, hækkið vel á pönnunni og hellið hvítvíninu útá (ég notaði hvítvín sem fæst orðið í flestum búðum eins og Krónunni og Bónus - það kemur saltað og piprað og er ekki ætlað til drykkju þó það sé áfengt) 
  • Leyfið þessu að sjóða hressilega í um 2 mínútur eða þar til að mesta hvítvínið hefur gufað upp. 
  • Látið 200 ml af rjóma útá, 1 msk af pestóinu og 1 msk af fljótandi humarkrafti. Ég þurfti ekki að salta þarna en bætti við smá pipar. 
  • Setjið rækjurnar útá
  • Sjóðið í 5 mín á vægum hita 
  • Skerið basilíkuna í strimla og hrærið samanvið 
  • Borið fram með nýbökuðu brauði sem notað er til að drekka í sig rjómasósuna og nýrifnum parmesan sem rifinn er yfir sósuna og rækjurnar þegar þær eru komnar disk hvers og eins.
Þessi réttur er virkilega fljótlegur (tekur ca 15 mín að útbúa) og það setja humarkraftinn útí sósuna færir sósuna á það stig að það yrði enginn ósáttur við að fá þennan rétt á veitingastað. 

Mæli með að þið prufið. 





psst. Hvernig væri að bjóða makanum á heimadeit og bjóða uppá þetta? ;) 


Punktar: 
-Hér má vissulega nota humar ef þið viljið
-Þessi sósa og rækjur henta unaðslega vel sem pastasósa. Sjóðið Tortellini og bætið saman við (sleppið brauðinu þá) Þessi skammtur af sósu ætti að henta 4 ef það er sett pasta samanvið
SHARE:

laugardagur, 14. nóvember 2020

Banana-og karamellubúðingur

Eftirréttur, eins og sá sem þú færð á veitingastöðum!

Silkimjúkur búðingur með karamellu-vanillubragði og svo leynast þarna óvænt bananar í botninum. 
Yndislegt alveg. 

Uppskrift 

(Fyrir 4 glös eða eftirréttaskálar) 

Í botninn: 

150 gr mulið digestive kex
3 msk sykur
4 msk bráðið smjör 


Aðferð:  

blandið saman  (möluðu) kexinu sykri og smjöri og þrýstið blöndunni í botninn og örlítið upp í hliðar á 4 desertskálum eða glösum. Kælið í 30 mínútur

Í fyllinguna:


215 gr púðursykur
30 gr smjör
3 msk (30 gr) maizenamjöl
350 ml nýmjólk
1/2 tsk salt
4 eggjarauður
1/2 tsk vanilluextract
2-3 þroskaðir bananar

Aðferð:

  • Bræðið smjör og blandið því saman við púðursykur, setjið í skál. Setjið þetta svo til hliðar
  • Í bolla, hrærið maizenamjölið útí smá af mjólkinni. Í potti, hitið restina af mjólkinni með saltinu þangað til að blandan er við suðu og hellið þá maizenamjölsblöndunni útí. Sjóðið þar til blandan þykknar.
  • Hrærið eggjarauðurnar saman í skál og hellið smá af heitri mjólkurblöndunni útí eggin. Hellið svo þeirri blöndu aftur útí heita mjólkina og hrærið þar til að blandan þykknar enn frekar (þetta endar á að verða svoldið eins og hrært majones.
  • Hellið/þrýstið blöndunni í gegnum sigti (ef ykkur kann að finnast þetta eitthvað kekkjótt) ofan í púðursykurblönduna, bætið vanilluextract við og hrærið vel saman. Sykurinn bráðnar. 
  • Skerið bananana niður í 5-6 mm sneiðar og dreifið yfir kexbotninn (ég notaði aðeins rúmlega 2 banana en það fer eftir smekk). Hellið blöndunni yfir bananana, geymið þetta í kæli í amk 2 klst áður en rjóminn er settur ofan á og borið er á borð. 
Kexið mulið 


kex-, smjör og sykur blandan sett í glösin og kælt




Allt að verða tilbúið til að setja saman blönduna í fyllingna



Fyllingunni hellt yfir bananana

Auka punktar:

  • Það er dásamlegt að setja karamellukúlukurl ofan á 
  • Það er líka æðislegt að setja smá vanillusykur útí rjómann þegar þið þeytið hann 
  • Það er hægt að geyma þetta í 2-3 daga í ísskáp ef þið sleppið að setja rjómann á og setjið plastfilmu yfir 
  • Það er hægt að hægelda eplabita uppúr smjöri, sykri, smá vanillu og kanil og setja í botninn í staðinn fyrir epli 
  • psst. þetta slær í gegn í matarboðum 



SHARE:

mánudagur, 9. nóvember 2020

Muffins með eplum

Mjúkar, bragðgóðar, einfaldar muffins. 

Fuuuuullkomnar fyrir þetta haust/vetrarveður sem læðist núna að okkur. 

Psst. Það næstbesta við þær (fyrir utan hve gómsætar, mjúkar og dásamlegar þær eru....) er að það þarf 2 skálar og eina sleif til að setja þetta allt saman. Engan handþeytara eða hrærivél frekar en þið viljið. 


Uppskrift:

Gerir 24 stórar muffins 


790 gr hveiti 
360 gr púðursykur 
1 tsk salt 
1 tsk matarsódi 
5 tsk lyftiduft 
400 gr grófbrytjuð epli 
500 ml súrmjólk
250 ml matarolía 
2 egg 
4 tsk vanillu extract (eða vanilludropar)

Krem: 

Flórsykur 
Mjólk 
Vanilludropar eða karamellubragðefni 
(magn af kremi ræðst af því hve mikið þið viljið setja á hverja muffins) 
-Ég notaði 2 bolla af flórsykri og hrærði hann út með mjólk þar til kremið var komið vel saman en þó frekar stíft. 

Aðferð: 

  • Setjið öll þurrefni saman í skál og blandið saman
  • Setjið öll blautefni saman í skál og blandið saman
  • Blandið öllu úr báðum skálum saman. Bara samt svo að það sé orðið vel blandað en ekki hræra lengur en það. Hér má nota vissulega nota hrærivél en þess þarf ekki. 
  • Grófbrytjið 4-5 epli og blandið saman við. 
  • Raðið muffinspappírsformum í muffinsbakka (nauðsynlegt) og bakið í ofni á 2 hæðum, á blæstri við 180°C í 25 mínútur 

Öll þurrefni sett í eina skál, öllum vökva blandað saman í eina skál


Öllu blandað saman 


Eplabitum blandað samanvið 


Sett í muffinsform og má fylla vel upp í topp. 



SHARE:

þriðjudagur, 19. maí 2020

Bananakaka á hvolfi með karamellu

Þessi kaka er himnesk. Stökkar hliðarnar eftir að smjörið bubblar á meðan hún bakast, mjúk og safarík karamellan sem umlykur safaríka bananana og svo ís til að toppa þetta allt er svolítið eins og himnaríki í köku verð ég að segja. 

Fyrir utan hve góð hún er þá tekur lítinn sem engan tíma að undirbúa hana þar sem öll innihaldsefnin hrærast saman í einni skál með sleif og svo er hún bökuð í hverskonar formi sem ykkur kann að láta ykkur detta í hug. 

Þó svo að ég notist hér við formkökuform þá má vissulega nota eldfast mót, lítið kringlótt form eða jafnvel baka þessa köku í pönnu sem má fara í ofn. 
Hún mun hvort sem er hvolfast á annan disk þegar hún er bökuð svo að formið sem hún bakast er aukaatriði. 



Uppskrift 

100 gr smjör, brætt
100 gr púðursykur 
2-3 bananar 

170 gr hveiti 
135 gr sykur 
1/2 tsk salt 
2 tsk lyftiduft 
1 tsk kanill 
3 msk matarolía
1 egg
1 tsk vanilluextract / dropar 
180 ml mjólk


Aðferð

-Bræðið smjör og blandið púðursykur saman við. Hellið í botninn á formkökuformi (það þarf ekki að smyrja formið áður
-Skerið bananana langsum í sneiðar og leggið yfir blönduna 
-Blandið restinni af innihaldsefnum saman í skál og hrærið með sleif þar til allt er vel blandað saman
-Hellið varlega yfir banana og bakið í 180°C heitum ofni á blæstri í 35 mínútur eða þar til kakan er karamellubrún að ofan
-Látið kökuna standa á borði í 15 mínútur eftir að hún kemur úr ofninum og hvolfið henni svo á disk.
-Borin fram volg með rjóma eða ís 

Setjið smjör og púðursykur saman í skál
Smjör og púðursykur sett saman í skál 
Smjör- og púðursykursblöndunni helt í botninn á forminu og bönunum raðað ofaná í botninn 

Þurrefnum, olíu, eggi og mjólk blandað saman í skál með sleif og svo helt yfir 

Þegar kakan hefur kólnað í 15 mínútur eftir að hún kemur úr ofninum er henni hvolft á platta eða disk svo að bananarnir sem voru í botninum séu nú efstir. 

ATH 

-Það er hægt að skipta út banönum í staðinn fyrir ananas, epli eða perur að vild. 
-Það má sleppa vanillu eða kanil ef þið eigið það ekki til 
-Rjómi er alveg jafn tilvalinn og ís 
-Ég setti Saltkaramellusósu frá Skúbb yfir ísinn.



Volg karamellu-kaka með banana og ís

SHARE:

fimmtudagur, 14. maí 2020

Ofnbakaður Camembert

Mmmmm

Bráðinn ostur, heitur, lekandi með dísætu hlynsýrópi!

Fullkomið fyrir datekvöld eða saumaklúbbinn. Já eða bara hvað-sem-er ! :)
Eftirrétt eftir grillið, kósíkvöld uppí sumarbústað, snarl uppí rúm seint um kvöld .... hvað-sem-er



Uppskrift 


1 camembert
2 msk hlynsýróp
2 msk muldar pekanhnetur
1 msk söxuð trönuber eða döðlur

Aðferð 


-Hitið ofninn í 200 gráður
-Skerið ofan í ostinn, 2/3 af leiðinni í gegn, skerið eins og þið væruð að skera eftir línunum í rúðustikuðu blaði :)
-Setjið 2 msk af hlynsýrópi yfir og bakið ostinn í 10 mínútur
-Takið hann út og setjið pekanhnetur og trönuber/döðlur yfir, bakið í 5 mínútur í viðbót.

Skerið í ostinn
Hellið hlynsýrópi yfir 

Ath 

Ég læt pekanhnetur og berin ekki vera allan tímann inni því ef þetta er allan tímann þá getur það ofeldast og orðið beiskt :) Þetta þarf aðeins að ristast en á alls ekki að brenna.





SHARE:

miðvikudagur, 13. maí 2020

Sterkur kjúklingur í Gochjang sósu

Ég ætla að gefa þessum alveg 6.5 af 10 í 🌶
Sem mér finnst alveg ótrúlega gott.
Elska að elda sterkan mat heima og þessi réttur rífur temmilega í og er með svo djúpu og skemmtilegu bragði að ég stóð mig að því að ausa sósunni sérstaklega bara yfir hrísgrjónin bara til þess að fá meira af þessu sæta, salta, sterka bragði!

Í sósunni er aðal stjarnan Gochjang paste sem fæst í ÖLLUM búðum sem selja asíumatvörur enda er þetta krydd notað í afar mörgum kóreskum réttum. Sem ég skil mjög vel. Liturinn og bragðið er svo einstakt og gott að ég hef notað þetta krydd í marga rétti undanfarið

Ég kýs að nota kjúklingalæri þar sem þau eru svo mjúk og góð þegar þau eru elduð í svona sósu. Þau þola líka mikinn hita án þess að þorna upp.


Uppskrift:

(fyrir 2-3) 

6-8 úrbeinuð kjúklingalæri (600-800 gr)
3 msk Gochjang paste
3 msk hunang
1 msk soyasósa
1 tsk sesamolía
1 tsk rifinn ferskur engifer
2 rifin hvítlauksrif
smá svartur pipar

Til skreytingar þegar rétturinn er kominn útúr ofninum:
Vorlaukur (græni hlutinn)
Sesamfræ

Aðferð

-Hrærið öllum innihaldsefnunum á marineringunni saman í skál
-Setjið kjúklingalærin útí og látið standa á borði í klst
-Hitið ofninn í 230 °C á yfir- og undirhita
-Raðið kjúklingabitunum eldfast mót, látið bitana ekki ofan á hvorn annan
-Eldið í 20 mínútur
-Kveikið á grillinu í ofninum og grillið við 230°C í 10 mínútur í viðbót
-Takið út og setjið vorlauk og sesamfræ yfir
-Borið fram með hrísgrjónum og fersku salati


Setjið marineringuna í skál 
Hrærið saman 
Hellið yfir kjúklingalærin og látið standa á borði í klst áður en þið eldið 
Raðið í eldfast mót og setjið inn í 230°C heitan ofn 
Breyið stillingunni á ofninum í grill eftir 20 mínútur og eldið þannig í 10 mínútur 
Vorlauk og sesamfræjum stráð yfir 

Borið fram með hrísgrjónum og fersku salati 



 Ath.
-Það er hægt að sjóða sósuna niður með því að hella henni í pott og sjóða þar til hún þykknar og bera hana fram þannig
-Tilvalið er að nota bygg eða blómkálsgrjón með þessum rétt.
-Frábært til þess að grilla í sumar og ef til vill hafa grillað brauð, létta hvíta sósu og ferskt grænmeti með


enjoy! :)

SHARE:

sunnudagur, 10. maí 2020

Hnetusmjörskökur með súkkulaðiperlum


Mig gæti hafa langað til að kalla þetta smákökur en þetta eru alls engar smákökur :) 
þetta eru stórir, djúsí, seigir, sætir hlemmar með stökkri skorpu. Já, alls engar smákökur ;) 

Vissulega mætti gera kökurnar minni, það er lítið mál og þarf þá bara að styttta bökunartíma í samræmi við það. 

Hugmyndin er samt hinsvegar að þetta séu kökur sem svipar til stóru djúsí kakanna á kaffihúsum og það er þess vegna engin tilviljun að þessar kökur bragðist dásamlega með heitum kaffibolla, kakóbolla eða stóru glasi af mjólk! :) 

Það er ótrúlega margt gott sem byrjar á smjöri og sykri ;) 

Og fátt sem verður ekki aðeins betra með smá hnetusmjöri 




Hér gerast töfrarnir með smá súkkulaði í sykurskel :) 



Risa kökur, mjúk og seig miðja... namm 






Uppskrift 

Gerir 18 stórar kökur 

(ath að einn bolli er 250 ml) 

1 bolli púðursykur 
1/2 bolli sykur 
220 gr lint smjör  
2 egg 
1 bolli hnetusmjör 
2 tsk vanillu extract/vanilludropar 
2.5 bollar hafrar 
1.5 bollar hveiti 
1/2 tsk salt 
t tsk matarsódi
2 pokar Nóa Síríus súkkulaðiperlur/2 bollar M&M eða Smarties 

Aðferð

-Þeytið saman púðursykur, sykur og smjör með handþeytara eða í hrærivél þar til blandan lýsist aðeins 
-Bætið við eggjunum einu og einu við og þeytið aðeins á milli (þarf ekki að þeyta mikið) 
-Hrærið hnetusmjöri og vanilluextraxt saman við svo það sé alveg blandað samanvið
-Hrærið þurrefnunum samanvið þar til blandað og að lokum bætið þið við súkkulaðiperlunum (rétt svo að það blandist saman) 
-Setjið deigið á bökunarpappírsklæddar plötur með 2 skeiðum, miðið við golfkúlu að stærð og setjið ekki fleiri en 6 kökur á hverja plötu þar sem þær renna mikið út. 
-Bakið við 180°C gráður í 15-18 mínútur á blæstri. Ath að kökurnar geta virst vera hráar þegar þið takið þær út en þær munu setjast og verða tilbúnar þegar þær kólna. Reynið þó að miða við að brúnirnar hafi tekið karamellulit. 
-stráið smá sjávarsalti yfir þegar þær koma úr ofninum 


Ath:
-Þetta er stór uppskrift, kökurnar geymast samt vel í lokuðu boxi í allt að 4-5 daga.
-Það er auðvelt að helminga þessa uppskrift. Endilega gerið það ef þið viljið ekki alveg 18 stk af stórum kökum :) 
-Þó það sé eflaust freistandi að borða þessar kökur volgar þá eru þær bestar þegar þær hafa kólnað aðeins. 
-psst. það þarf alls ekki salt yfir þegar þær koma út. 
-Það er hægt að nota grófsaxað súkkulaði í staðinn fyrir súkkulaðiperlurnar 





SHARE:

miðvikudagur, 6. maí 2020

Köld sinnepssósa

Æðisleg sinnepssósa sem bragð er að! 
Frábær með grillinu í sumar eða fiskréttum.
Geymist vel og um að gera að gera nóg af henni til að eiga.

Uppskrift: 

2 kúfaðar msk majones 
2 kúfaðar msk sýrður rjómi
1 tsk dijon sinnep
1 tsk sætt sinnep 
2 tsk sítrónusafi 
1/4 tsk hvítlaukskrydd/duft 
salt og pipar eftir þörfum 
3 msk gróftsaxaðar sinneps-sprettur 


Aðferð:

Hrærið öllu saman í skál ogl látið standa í amk 15 mínútur áður en þið berið fram. 


SHARE:

fimmtudagur, 16. apríl 2020

Banana- og Döðlubrauð

....án sykurs ;) 





Ég hef verið að prufa mig áfram með Sweet like sugar í stað þess að nota venjulegan sykur og það hefur komið vel út í flestum tilfellum :)

Hér er uppskrift af hollu heimabökuðu brauði sem er aðeins kryddað en afskaplega sætt, mjúkt og gott!

Það góða við þetta er að það tekur stuttan tíma að skella þessu saman, þarf aðeins skál, gaffal, sleif og formkökuform og svo geymist þetta afskaplega vel næstu dagana.

frábært með smjöri og osti!

Uppskrift

(1 bolli eru 250 ml)
3 stappaðir bananar
1/2 bolli saxaðar döðlur
1.5 bolli hveiti
1/2 bolli Sweet like sugar (eða venjulegur hvítur sykur)
1 bolli haframjöl
2 egg
1/2 tsk salt
1 1/2 tsk matarsódi
1/2 tsk negull
1 tsk kanill

Aðferð 

-Bönunum, döðlum, eggjum og sykri hrært saman.
-Öðrum þurrefnum bætt samanvið
-Sett í smurt form og bakað við 180°C í ca 50 mínútur á undir/yfir hita.
SHARE:

laugardagur, 28. mars 2020

Skúffukaka - mjúk skúffukaka

Alveg dásamlega dökk, alltaf mjúk, hverfur á methraða :) 

Þessa köku þarft lágmarks búnað til að útbúa, bara skál, sleif og skúffukökuform, tilbúin í ofninn á 10 mínútum og komin út úr ofninum eftir 25 mínútur. Snöggbökuð þegar gesti ber að garði eða þegar strax-veikin nær yfirhöndinni (#langaríkökustrax-veikin).

Ath, ég hef notað jarðaberjajógúrt og karamellusúrmjólk án teljandi vandræða þegar ég hef ekki átt til súrmjólk ;)
Öll þurrefnin í skál

Öllum blautefnum bætt við 

Smyrja mót, 

Formið sem ég nota er úr IKEA 


Uppskrift:

250 gr hveiti
75 gr kakó
2 tsk matarsódi
1 tsk lyftiduft
1/2 tsk salt
300 gr púðursykur
2 egg
100 ml matarolía
250 ml súrmjólk
200 ml uppáhelt kaffi (látið kólna smá)
1 tsk vanilluextract/vanilludropar

Aðferð: 

-Hveiti, kakó, lyftiduft, matarsódi og salt sigtað saman í skál
-Hrærið púðursykur samanvið
-Bætið við eggjum, matarolíu, súrmjólk, kaffi og vanilludropum með sleif
-Setjið í smurt skúffukökuform (ef þið ætlið að nota ofnskúffu gerið þá eina og hálfa uppskrift).
-Bakið við 180°C í 25 mínútur á blæstri.


Krem:

Annað hvort gerið þið glassúr úr vatni, flórsykri, vanilluextraxt og kakó eða kremið sem ég geri vanalega sem er:

350 gr flórsykur
30-45 gr kakó
70 gr brætt smjör
1 tsk vanulluextract/dropar
1 egg
1-2 msk heit vatn ef þið þurfið að þynna kremið

Hrærið saman með písk





Enjoy


SHARE:
Blog Design Created by pipdig