Svínakótilettur í kryddjurtaraspi

Sá um daginn svínakjöt í bónus og langaði að prufa eitthvað nýtt með svínakjöti. Satt að segja finnst mér íslenskt svínakjöt ekki jafn gott og til að mynda danskt og breskt, ástæðan er sú að mér finnst vera alveg sama hvernig maður eldi það, þá verði það alltaf seigt.
Viðar fékk að velja annað hvort svínagúllas eða svínakótilettur og kótilettur urðu fyrir valinu.

Eftir smá brainstorming ákvað ég að taka alla fitu og allt það sem maður myndi hvort sem skera af þegar maður færi að borða kótiletturnar. Að lokum skar ég beinið frá.
Til að reyna ná kjötinu aðeins meyrara barði ég það með buffhamri á báðum hliðum.

Því næst var að undirbúa raspinn og eggin. Ég notaði 1 egg + 3 msk af mjólk. Þessa blöndu kryddaði ég svo með salti, pipar og örlitlu steikarkryddi (ath að þetta þarf að krydda örlítið ríflega þar sem ekki mikið af blöndunni fer utan á kjötið).  Raspurinn samanstóð af brauðraspi (venjulegum) og Panko-brauðraspi (japanskur), einfaldlega af því að ég átti bara smá af panko-raspinum. Annars hefði ég líklegast bara notað þannig. En þetta kom vel út svona 50%/50%  og er líka alveg örugglega jafngott bara með venjulegum brauðraspi. út í raspinn saxaði ég ferskar kryddjurtir. Fyrir valinu var flatlaufa steinselja og timian. Séu ferskar kryddjurtir ekki við hendina myndi ég nota ítalska þurrkaða kryddblöndu. Til að setja eitthvað aðeins meira í raspinn reif ég parmesan-ost út í raspinn

Svo er bara að undirbúa og elda 

Þekja hverja sneið með eggja og mjólkurblöndunni

Þekja síðan vel með mylsnunni

Steikja á pönnu þar til vel krispí báðum megin

Sveppir steiktir í restinni af olíunni til að gera sósuna

Meðlætið var kartöflumús og Péturseyjar gulrætur

Uppskrift: 

5 stk svínakótilettur með beini 

1 stk egg 

3 msk mjólk

salt + pipar + krydd að ykkar vali

1,5 dl venjulegur brauðraspur

1,5 dl panko brauðraspur

3 msk saxaðar ferskar kryddjurtir (steinselja + timian) eða 1-2 msk þurrkaðar
3 msk rifinn parmesan ostur

aðferð:

farið eftir myndunum hér að ofan til að útbúa raspinn utan á kjötið. 

Steikið svo í matarolíu eða ólífuolíu á pönnu. Ath að það þarf mikið af olíu þar sem raspurinn drekkur olíuna alla í sig. Ég giska á að ég hafi notað um 70 ml af olíu. 

Þegar kjötið er orðið brúnt og krispí setið það þá á ofnheldan disk eða eldfast mót og hafið á 50-70°C hita inní ofni á meðan sósan er útbúin á pönnunni. Afgangsolía er nýtt til að steika sveppi, þeir eru saltaðir og pipraðir og 1.5 dl af rjóma er hellt út á ásamt 1 dl af mjólk. Þetta er soðið upp og bætt útí hálfum tenging af kjötkrafti (í mínu tilfelli notaði ég sveppakraft, um 1 msk). Sósan var þykkt aðeins með maizena sósudufti og svo borin fram með kjötinu. 

Meðlæti var kartöflumús og að sjálfsögðu var smá sætt með og var rifsberjahlaupið frá mömmu notað.

Snilldar gott og svo góð tilbreyting frá steiktum svínakótilettum að ég mun gera þetta oft aftur.

punktar: 

• Nota kjúkling í stað svínakjöts 
• í stað kartöflumúsar hefði einnig hefði verið gott að hafa nýjar soðnar kartöflur, kúskús eða bygg.
• Ekki er nauðsynlegt að hafa sósu með 

Gourmet matarklúbbur - Erla Þóra

Ég, Erla Þóra og Brynja kynntumst í Bretlandi þegar við vorum þar allar í sitthvoru lagi sem Au-pair í kringum 2005-2006. Af einhverri ástæðu fórum við allar 3 að læra hjúkrunarfræði haustið 2006, ég í Reykjavík og þær tvær á Akureyri. Nú 4 árum síðar höldum við ennþá sambandi og hittumst af og til og alltaf er svo gaman hjá okkur þegar það gerist. Til þess að passa okkur á að missa ekki samband og njóta þess sem oftast að hittast þá kom sú hugmynd frá Erlu eða Brynju að við myndum stofna matarklúbb. Við erum allar svo miklir matgæðingar að það varð að vera mjög sérstakur matarklúbbur og var því ákveðið að það yrði að vera GOURMET matarklúbbur þar sem nýir réttir yrðu prufaðir og við yrðum svoldið creative í eldamennskunni.
Planið var sett á að hittast einu sinni í mánuði, með eða án maka og nú þegar hafa 2 kvöld verið haldin með svo rosalega miklum árangri, afveltu og skemmtun að ég hlakka mikið til þess þriðja (þar sem kemur að mér að elda).

Ég hef platað stelpurnar til að gefa mér uppskriftirnar til að setja á netið og hér kemur uppskriftin að því sem Erla bauð uppá í matarklúbbnum sínum. (Við þurfum að taka aðeins markvissara góðar myndir í næstu kvöldum til að gera þetta enn skemmtilegra ! )

Erla bauð upp á frábærlega skemmtilegan rétt sem heitir Korean Beef.
í stuttu máli er það saltatblað sem hver og einn setur hrísgrjón og kryddaða/marineraða nautakjötsstrimla inní, vefur saman og dýfir svo í dip og borðar með puttunum. Það er EKKERT jafn gaman og að borða með puttunum krakkar!

Uppskriftin kemur á ensku með smá tips og hints fyrir ykkur til að pæla aðeins í.

gjörið svo vel:

Korean beef 

Fyrir 4

2 sirloin steaks (ca. 250g each)
8 soft lettuce leafs (t.d. lambhagasalat eða bok choi)
200g jasmine rice (má alveg vera meira)
1 matskeið sesame seeds

Marinering:
2 spring onions 
2 garlic cloves, crushed
5cm knob of fresh root ginger, grated
1 teskeið sesame oil
2 matskeiðar rice wine or dry sherry (ég sleppti þessu nú reyndar)
3 matskeiðar soy sauce (I prefer the Blue Dragon one - hún er sætari og mucho góð í þetta)
1 matskeið sweet chili sauce
1/2 teskeið ground black pepper
1 matskeið sykur
Svo má líka klárlega gera meira af marineringunni því hún er svo góð.. ég gerði alveg þrefalda uppskrift fyrr okkur. Svo má klárlega smakka þetta til og adjust-a eftir smekk.

Soy chili sauce - dipping sósa:
2 matskeiðar soy sauce
2 matskeiðar sweet chili sauce

---

• Create marinade
• Slice beef thinly
• Marinate beef for an hour or so
• Wash, dry, chill lettuce leafs
• Mix the soy chili sauce and set aside
• Cook the rice
• Heat a heavy fry pan, sear the beef
• Scatter with sesame seeds

Þetta er GEÐVEIKT gott.

meðlæti getur verið hvað sem ykkur dettur í hug. t.d. stir fry grænmeti, stir-fry kjúklingur eða bara sem alger aðalréttur á eftir forrétt. 

Önnur góð hugmynd er að gera smárétti úr þessum rétti. þ.e. taka salatblöðin í litla bita, setja hrísgrjón ofan á + kjöt og dipping sósuna og raða fallega á bakka fyrir hvern og einn til að taka sér í veislu.

mana ykkur til að prufa þetta

Bláberjadaður

Jæja....

Long time no see.

Í síðustu viku fór ég í bláber. Skemmdi 2 dekk og stóð í alskonar ævintýrum þann dag. Ég týndi samt ansi lítið af berjum vegna þess alls og stefni því að fara aftur um helgina eða eftir helgi..

Það tók því ekki að sulta neitt úr þessum berjum og voru því frekar sett í skál og hafa verið étin hér næstum á hverjum degi síðan. Í gær var komið að því að annað hvort frysta berin eða gera eitthvað úr þeim svo að ég lagðist í smá rannsóknarvinnu og fann svo skemmtilega köku að ég ákvað að ég yrði að prufa hana.

Kakan á sér smá forsögu frá árinu 1954 þegar 15 ára stelpa lenti í öðru sæti í Pillbury kökukeppni í Bandaríkjunum og vakti fyrir það mikla athygli. Síðan þá hefur þessi kaka verið bökuð á mörgum Bandarískum heimlum og er mjög vinsæl. Kakan hét þá Blueberry boy bait, eða Bláberja stráka-beita. Stelpan lýsti því að kakan væri svo góð að ef strákar myndu fá sér bita þá myndu þeir verða fyrir miklum áhrifum frá kökunni.

Uppskriftin er eftirfarandi 

deig
230 gr smjör (mjúkt)
1/2 bolli sykur
3/4 bolli púðursykur / eða ljós púðursykur
3 egg
2 bollar hveiti
1 msk lyftiduft
1 tsk salt
1 bolli mjólk
1/2 bolli bláber

ofan á kökuna:
1/2 bolli púðursykur eða sykur
1 tsk kanill
1/2 bolli bláber

Aðferð 

Fyrst er að gera hrært deig. Þ.e. setja smjörið í skál ásamt öllum sykrinum og þeyta saman í ca 2 mínútur.
Þar næst er eggjunum bætt við, aðeins einu í einu og þeytt í ca 15-30 sekúndur á milli hvers eggs svo að hræran skilji sig ekki (reyndar hef ég prufað sjálf þegar ég eitt sinn bakaði 20 formkökur í einu að setja öll eggin bara í einu og hræra. Eggin þurftu aðeins meiri þeytingu, enginn dó og kökurnar voru fullkomnar). En farið bara eftir þessu og hana nú :)

Út í smjörið, sykurinn og eggin er síðan öllum þurrefnunum skellt saman við auk 1 bolla af mjólk (ég bætti ca 1/4 bolla í viðbót í deigið)  og hrært þar til allt er vel blandað saman (muna, ekki hræra OF mikið).

Þegar allt er komið saman er hálfum bolla af ferskum eða frosnum bláberjum  hrært samanvið og sett í skúffukökumót (ef þetta á að að fara í stórt skúffukökuform þá þarf 2falda uppskrift, mitt form er ca 30x15 cm).

Ofan á óbakaða kökuna er dreyft yfir 1/2 bolla af bláberjum og kanilsykursblöndunni svo stráð yfir.

Bakað í ofni á miðhillu á 180°C í ca 30-45 mínútur eða þar til prjóni sem er stungið í kökuna kemur hreinn út. í guðanna bænum fylgist bara með kökunni af og til :)


Bjálæðislega góð kaka, pínu óvenjuleg með nýtt bragð. Bragðmikil og alveg rosalega mjúk.

punktar: 

• Gæti verið gaman að setja aðra ávexti í kökuna einso t.d. kokteilber, hindber, ananas, epli ofl. 
• Sleppa öllum púðursykrinum í kökunni og setja aðeins sykur. Kakan er svoldið sæt og pínu karmellukennd vegna púðursykursins. 
• Gera 1/2 uppskrift og setja í eldfast form og borða heita með ís í saumaklúbbnum. 
• Setja meiri bláber !!! :) 

Því miður tók ég engar myndir af kökunni en eftir smá leit á netinu fann eg mynd sem líkist minni köku.

Endilega eyðið nú smá af berjunum ykkar í eina svona köku og frystið einnig helling af berjum svo þið getið gert kökuna í allan vetur :) 

Í mat hjá risunum

Dagur í Fjöregginu

Hver er þessi einar?

Og hver er Hækjan...
já hækjan er örugglega ég og einar er vinstri fóturinn minn og ég og einar höfum verið að brasa ansi margt sl daga. Ég gengum um á einari (hoppa og haltra), ég elda á einari, ég fer í sturtu á einari... osfrv.

Forsagan er sú að ég ætlaði að dansa aaaðeins á Þjóðhátíð. Engin góð saga bak við það að "detta" í brekkunni eða hafa verið ofurölvi. Neibb, létt og kát á brá og missteig mig á flösku sem lá þar drukkin og tóm á dansgólfinu við stóra sviðið. Við það að misstíga mig fann ég skelfilegan smell og haltra út af dansgólfinu með herkjum og bít það í mig að ég VERÐI Að ná í kælingu og teygjusokk ASAP. Ég haltra því hálf kjökrandi upp í sjúkratjald þar sem ég bið um vistirnar og þar hittir Viðar mig svo. Ég bar mig mjög vel miðað við allan helvítis sársaukan og hoppa svo uppí Hvíta tjaldið hjá Gauja og Gústu og sé þá þessa FÍNU kúlu sem er strax tekin að myndast á utanverðum ökklanum. Eftir smá pælingar í Ottawa fannst mér vissara að taka nú röntgen og fer því upp á Slysó í eyjum í þeim erindagjörðum. Svo fer ég einfaldlega norður á Akureyri í smá dekur til þess að jafna mig í ökklanum og fæ ekkert út úr myndinni og segi því einfaldlega við fólk að það hefur greinilega verið ekkert að sjá í henni. Amk sást strax þarna um nóttina engin greinileg brot.
...
SVO fæ ég símtal frá Eyjum... ööö...eeee... það er líklegt að þú sért með syndesmosis rupturu og það greinist víkkað bil á milli fibulu og tibiu. andskotans djöfulsins djöfull!! Eyjamenn vilja senda mig í segulómun og fá álit bæklunarlækna með tilliti til aðgerðar og fleira vesens. (Aðgerð í þessu tilfelli hefði þýtt 2stk nagla boraða í gegnum leggjabeinin og gifst í allt of margar vikur með engu ástigi!).  Að auki var mér tilkynnt að ég hefði ekkert mátt stíga í fótinn og megi alls ekki gera það. (dem)

Ég var auðvitað á Akureyri og þeir höfðu engin úrræði fyrir mig þar vegna sumarleyfa svo ég fór bara suður og kíkti á Slysó hér í Rvk.
Eftir hálf taugatrekktan dag á Slysó, endurmat og pælingar var ég úrskurðuð með 3°tognun... sem er svona "næstum allt í sundur en sleppur þó" greining. Núna þarf ég bara að jafna mig, fara hægt af stað og ALLS ekki misstíga mig á næstunni. Liðurinn er laflaus og liðböndin aum ...og marið er tjah, ansi skrautlegt.

viljiði sjá ? :)

Um nóttina... smá búhú

Morguninn eftir... ógeðslega bólgin 

Kvöldið eftir:

afmyndaður og bólginn ökkli

Mánudagur... (dagur 3)

Þriðjudagur (dagur 4)

Fáránlega erfitt að mynda mar... En þetta er alveg frá tánum upp alla hægri hliðina, yfir hásinina og innaná hælinn. Allt það sem er ekki dökkfjólublátt er grænt eða ljósblátt. NÆS ! :) 

Þá finnst mér hann einar minn sætari og mun skemmtilegri þessa dagana. 

Frí í vinnunni í amk viku skv Skúla. Ég tek því fyrstu vaktina næstu mánudagsnótt og þar til er ég að passa mig. Já í alvöru. Ætlum samt að reyna að fara á ættarmót með hækjurnar í eftirdragi og í vinnustaðarútilegu hjá Viðari. Ég á eftir að njóta þess smá að sitja og ota hækjunum í hann þegar hann tjaldar! 

Annars er ekkert í fréttum þannig séð. Það eina rosalega sem hefur gerst fyrir utan þjóðhátíð, ökklavesen og tilhlökkun til að fara í vinnuna aftur er það að ég kom að konu sem hafði fallið afturfyrir sig á Akureyri í vikunni. Ég kom þarna að ásamt 2 öðrum sem voru þar fyrir og sáu þetta gerast og sá fljótt að eitthvað var ekki í lagi. Eftir fljótlega ABC skoðun var það ljóst að konan var með engu lífsmarki.  ÞÁ var nú gott að vera hjúkka, vera búin að sjá hjartastopp áður og kunna handbrögðin. . . Sjúkrabíllinn kom og 4 vaskir menn tóku við af mér og öðrum sem þarna voru. Héldu áfram endurlífgun, barkaþræddu, settu upp mergnál, stuðuðu 2-3x, komu henni í hnoðbrettið og svo hélt ég á brott. Veit satt að segja ekki söguna meir. 

Það er nú ekki langt síðan ég var að ræða það við Viðar hvenær það myndi gerast sem ég kæmi að einhverju slysi eða slíku þar sem ég yrði að vera hjúkrunarfræðingurinn á staðnum og nota þekkinguna. Það liðu örugglega ekki nema 2 dagar þarna á milli og þá var ég á hnjánum að hnoða. . . merkilegur heimur.

Kjúklingaborgarar í Naanbrauði

Eftir að Rachel Ray var í Skjá einum hvern einasta virkan dag í töluvert langan tíma hefur mig langað til þess að á íslandi fengist kjúklingahakk. Eftir að ég fékk matvinnsluvélina í jólagjöf síðustu jól varð mér það samt ljóst ða ég þarf ekki lengur  kjúklingahakk til að gera kjúklingabollur eða borgara. 


Ég klambraði þessari uppskrift saman með Saffran kjúklingaborgarana í huga. s.s. Kjúklingaborgari, naanbrauð og jógúrtsósa.


Þetta var mín tilraun

Uppskrift - Kjúklingaborgari   um það bil 6 stk 


650 gr kjúklingabringur
5 vorlaukar (skilið eftir ca 2-3 cm af þessu græna efst)
1.5 msk engifer 
2 stk hvítlauksrif
1.5 msk cummin
2 tsk paprikuduft
1.5 tsk sítrónusafi 
ca 2 msk fersk steinselja
1 tsk salt
1/2-1 egg
1 dl brauðmylsna
dass af pipar


Allt þetta er sett í matvinnsluvél og mixað saman. Engiferið og vorlaukinn og bringurnar er skorið niður í aðeins minni bita áður. 

Þetta er svo sett inn í ísskáp í hálfa-heila klst áður en þetta er mótað í litla borgara og steikt á heitri pönnu/grillpönnu

Uppskrift - Tzatziki  sósa

2 dl grísk jógúrt
hálf agúrka
1-2 hvítlauksrif
1 tsk salt
1/2 msk sítrónusafi
1 msk ólívuolía 
1 msk Dill (ég sleppi því)


Agúrkan er skorin langsum og fræin eru skafin úr með teskeið. Hún er svo rifin á frekar grófu rifjárni og sett út í jógúrtið. Einnig er hvítlauksrifið rifið á rifjárninu (fínni hliðinni ef það er í boði). Restinni af innihaldinu er svo hrært samanvið. 

Naan brauð... Ég gerði mitt eigið naanbrauð sem ég steiki á mjög heitri pönnu. Þegar ég er búin að steikja brauðið bursta ég örlítið af hvítlauksolíu á aðra hliðina og strái pínu salti yfir brauðin. Endilega leitið að  ykkar uppskrift á netinu (e. Naan bread recipe). Mín uppskrift er satt að segja ekki til neinsstaðar nema í höfðinu á mér. 

Samsetning :
Naan brauð, sósa, nokkur lauf af spínati, kjúklingaborgari, rauðlaukshringir, smá sósa aftur og að lokum naanbrauð aftur




Rosalega gott, nýtt og hollt 


enjoy

Svar við kommenti

Fékk komment um daginn þar sem einn lesandi sagðist hafa þurft að baka kökuna lengur en í 60 mínútur. Mín kaka var kannski í 63 mínútur inni þegar ég tók tímann svo að það er greinilega alltaf einhver mismunur þar á.

Einnig var spurt hvar micro rifjárn fengist en þau fást bæði í Kokku og Duka í kringlunni og jafnvel á fleiri stöðum án þess að ég viti til um. Með því járni næst rétt rúmlega 2 tsk af rifnum sítrónuberki en stærð sítrónunnar ræður einnig magninu.

Endilega kommentið með spurningar eða athugasemdir eins og ykkur lystir og ég mun svara þeim ef kommentum sem ég get.

Ástæðan fyrir bloggleysi eru 4 næturvaktir í röð beint á eftir 3ja daga útilegu.  Ég sef semsagt alla daga þessa dagana

kv
Ragna

Leiðrétting !!

Jahérna !

ég hef EITTHVAÐ ruglast! og það á mjög mikilvægu atriði !

Béarnaise sósan sem ég talaði um hér í útilegupóstinum er EKKI frá ÚRVALS... hún er bara ekki einu sinni góð...

Ég var með sósuna frá Nonna litla !

Djúsuss

ég biðst 100x afsökunar á þessu

Tyrklandsmemories

Fylltir sveppir

Átti 3 stóra sveppi eftir í sveppaöskju um daginn og ákvað að gera eitthvað úr þeim. Klambraði því þessu saman eitt kvöldið þegar vinur Viðars var í heimsókn. Kom svo í ljós að hann er með mestu matargikkjum sem ég hef kynnst svo að það var 1,5 sveppur á mann (Ég og Viðar).

Fyrst er að saxa laukinn, hvítlaukinn, beikon, fjarlægið stilkana úr sveppunum og saxið þetta allt mjög fínt eða eins fínt of þú nennir...

Það er svo allt steikt á pönnu í örlítilli olíu þar til það er orðið smá brúnt og mjúkt og saltað og piprað

Fyllingin er sett í sveppina og svo er parmesan rifinn með rifjárninu góða.. og það ekkert lítið magn! Honum er svo skellt ofan á fyllinguna og inní ofn sem er stilltur á 200°C 

Þetta er svo tilbúið þegar sveppirnir eru orðnir mjúkir og osturnn smá gullinn

Gjörið svo vel ! ;) 

Uppskrift:

3 stórir sveppir (má vera portabello ef þú hefur efni á þeim.. :-o .. )

1/2 laukur

1 hvítlauksrif

3 beikonsneiðar

1 msk matarolía

salt og pipar eftir smekk.

nokkrir punktar:

-Breytið magni eftir því hve marga sveppi þið kjósið að nota 

-Einnig hægt að bæta rjómaosti eða gráðaosti útí blönduna 

-Hægt er að sleppa parmesanostinum og nota annan ost í staðinn eða sleppa ostinum

-setjið sveppina í álbakka og skellið þeim á grillið ! 

Myndir

Myndir frá útilegunni í Húsafelli frá liðinni helgi eru komnar á Smugmug. 

Þær má skoða hér

Grillað nautakjöt með meðlæti

Útilega MEÐ STÆL !

Nautalund frá Íslandsnauti sem lofar fullmeyrnuðu nautakjöti.. Hefði þó verið gott að hafa steikarhníf með (note to self). Béarnaise-sósan kemur frá Úrvals Nonna litla ! og er alveg rosalega góð... Aðeins dýrari en aðrar kaldar Béarnaise sósur í Bónus en alveg fyllilega þess virði ! Kjötið var kryddað með steikarkryddblöndu  sem heitir Burgundy beef - dry rub, frá Weber. Alger snilld... snilld snilld... Kaupið bara ókryddað lambakjöt eða nautakjöt og þurrkryddið það og pakkið í box fyrir útileguna og sparið ykkur nokkrar krónur með því að kaupa ekki fyrirfram kryddað kjöt í pakkninum. Nautakjötið kryddaði ég þó bara á staðnum en lambakjötið krydda ég fyrirfram. (Burgundy BEEF? iss.. má þess vegna vera burgundy LAMB mín vegna) 

Meðlætið var:

Grillkartafla með hvítlaukssmjéri, þarf um 40-60 mín í álpappír á beinum hita á grilli ef hún er ekki forsoðin

Grillað grænmeti á teini. Keypti mér í vor svona grillteina frá IKEA. Mjög sniðug kaup. Ekki dýrir teinar, ekkert vesen með að leggja trépinna í bleyti og kveikja svo í þeim hvort sem er og auðvelt að taka í hringinn til að snúa þeim við (í hanska eða með peysuerminni, sem var minn kostur). Grænmetið var ég búin að skera niður í bita og setja í box áður en lagt  var af stað. Sveppir, laukur, kúrbítur og spergilkál, allt í bitum, hvítlauksolíu hellt yfir og piprað smá. Þrætt á teinana við grillið og grillað þar til það er orðið mjúkt og búið að taka smá lit 

Vinstra megin í efra horninu má sjá kanilsykur í boxi. Ég blogga síðar um hvað ég gerði við hann 

þar til næst ! 

ciao

Sítrónuformkaka með bláberjum

jahá. Einhver villa hefur birst í uppskriftinni í fréttablaðinu í dag. Hér kemur rétt uppskrift

Ath, nú eru myndir komnar með ! 

Uppskrift
1/2 bolli smjör
1 bolli sykur
2 egg
1 1/2 bolli hveiti
1 tsk lyftiduft
1/8 tsk salt
2 tsk rifinn sítrónubörkur
1/2 - 3/4 bolli mjólk
1,5 bolli bláber, helst frosin

yfir kökuna:
4 msk sítrónusafi
4 msk sykur

Aðferð
Smjör og sykur er þeytt vel saman

og eggjunum bætt útí einu og einu í einu og þeytt vel á milli.

Eitt egg og þeyta vel 

Og annað egg og búið að þeyta vel 

Sítrónubörkur af ca 1/2 sítrónu er rifinn af. Ég elska Micro rifjárnið mitt

Hveiti, lyftidufti, salti og sítrónuberki er blandað saman við ásamt 1/2 bolla af mjólk. Meiri mjólk er bætt í ef deigið er of þurrt.

Einn dag mun ég leggja þessum bjévítans handþeytara ! 

Bláberjum er hrært samanvið með sleif og deigið er sett í formkökumót og bakað í 50-70 mínútur á 185°C á miðhillu í ofni.

Bláberin týni ég á haustin og þau sem ég sulta ekki úr frysti ég í nokkrum boxum og nota yfir allt árið

Sykurinn og sítrónusafinn er hitað yfir vægum hita þar til sykurinn leysist upp. Þegar kakan kemur úr ofni er prjóni stungið í hana á nokkrum stöðum

ok... manni líður eins og maður sé að ráðast á kökuna 

 og safanum hellt yfir kökuna

Þessi sítrónusykurblanda gerir svo sannarlega punktinn yfir i-ið

Segi enn og aftur að ég mæli með þessari mjúku, köku sem er svo fersk og bragðgóð :)

Föstudagur

Jæja... Ég skoðaði Fréttablaðið með eitt auga lokað og hitt tilbúið að lokast hratt. Mynd af mér í blaðinu haldandi á einhverri einhverr ófrumlegri köku. Enda sagði ég við blaðamanninn að ég hefði engan tíma í neitt stúss en ég væri að fara að baka fyrir útilegu.

Greppitrínið á mér er því í blaðinu í dag og kenni fólki að gera sítrónuformköku með bláberjum. Fólk verður að prufa hana sko. Hún er svo góð !

Ég kem svo með lengra blogg um þessa köku eftir helgi þar sem ég tók myndir af því þegar ég gerði hana (eða þær, ég gerði 3 fyrir okkur).

Næst á dagskrá er morgunvakt og síðan bruna úr bænum ekki seinna en hálf 5 og eins og Viðar sagði í gær, það verður bara að koma í ljós hvort að hann komi þá eða seinna.. haha. Enda brjálað að gera í vinnu hjá honum. Hér er samt eiginlega allt tilbúið. Allt komið ofaní tösku og allur matur kominn í marineringu sem á að vera það og restin niðurskorin í boxum. Þarf bara að sækja rafmagnskæliboxið niður í geymslu og framkvæma það ógerlega... koma matnum fyrir í því !

eigið góða helgi

útilegubakstur

Baka og baka fyrir útilegu sem áætlað er að fara í um helgina. Það er samt spáð einhverri rigningarskömm á flestum stöðum á íslandi sem eru innan helgarferðarkeyrslufjarlægðar. . . Stefnan er SAMT sett á útilegu þar til annað kemur í ljós :)

Ef ekki þá verður Nonni brúkaður til hálendisdagsferðar því að nóg er amk til af bakkelsi ;)

Svo er ég næstum viss um að ég muni blogga eitthvað um baksturinn.. en ekki alveg strax.

Bolognese sósa - Ítölsk kjötsósa

Oh... nammi namm. Einn af mínum uppáhaldsréttum sem ég geri annað hvort mjög oft eða of sjaldan. Ætli það sé að byrja annað æðið fyrir ítölskum tómatasósum? Anyway. 

Til að fræði ykkur óbeðin um Bolognese sósu þá er það tómatasósa hefur aðauppistöðuna sem kjöt. Flestir þekkja þessar sósur með tómatbitum í og með hakki en í rauninni er sósan upprunanlega ekki með mikið af tómötum og í stað þess að hafa hakk þá er sumsstaðar notaðir kjötbitar sem eru soðnir það lengi í sósunni að þeir rifna að lokum í sundur. 

Sósan kemur frá Bologna héraðinu í Ítalíu og þaðan er nafnið komið.

Ég geri þessa sósu sitt á hvað. Ef ég á það til þá steiki ég sellerí og gulrætur með lauknum og hvítlauknum sem er þá fínsaxað. Ég nennti ekki í búð en langaði að elda þar sem ég á orðið ágætlega vel sprottnar kryddjurtir í glugganum hérna í Stubbaseli og langaði að nota þær í eitthvað. Ég átti frosið hakk, tómata í dós, lauk og hvítlauk... Ég hélt reyndar að ég ætti spagetti en svo varð raunin að ég átti bara tortellini, núðlur og skrúfur. Einhver myndi fussa yfir bolognese með skrúfum en ekki spagetti og ég afsaka því letina í mér að nenna ekki útí Nóatún til að kaupa spagetti. Anyway. Svona leit afraksturinn út og bragðastði alveg heavenly með hvítvínstárinu. 

Uppskrift:

500 gr nautahakk

1 laukur

2 hvítlauksrif

2 msk olía

1 dl rauðvín (ath að matarrauðvín fæst orðið í Hagkaupum og Fjarðarkaupum amk) 

ca 3 msk af ferskum kryddjurtum, saxaðar niður. Ég notaði salvíu, oregano og timian

2 lárviðarlauf

10 blöð af basilíku

2 dósir af hökkuðum tómötum

1 dós af tómatpúrru

4 dl vatn

1 msk púðursykur eða sykur 

salt og pipar

herbamare salt 

1 teningur af kjötkraft

Laukur og hvítlaukur er steikt í olíu í ca 2-4 mínútur. Rauðvíni er helt út á og það soðið niður þar til að það er næstum horfið. Hakkið er þvínæst steikt, saltað og piprað og tómötunum, púrru, lárviðarlauf  og vatni hellt út á ásamt kjötkraft og sykri . Allt er látið malla í ca 15 mínútur en þá er söxuðu kryddjurtunum bætt við og látið sjóða í 10-15 mín í viðbót. Í lokin er þetta smakka til með kryddi og basilíkan skorin niður í mjóar ræmur og sett útí. Pastanu sem var soðið á meðan sósan mallaði er hellt í sigti og síðan sett á disk. Vænn slurkur af sósu er sett ofaná pastað (helst spagetti!) og rifinn ostur settur þar yfir. 

Ég notaði parmesan sem ég kaupi reglulega í búrinu í Nótatúni. Allir sem hafa áhuga á ostum eða vilja fá frábæra þjónustu með val á ostum fyrir veislur skulu heimsækja hana Eirnýju og ég lofa að þið labbið brosandi út :) skoðið heimasíðuna á www.burid.is

borðist svo með góðri lyst! 

2 punktar í viðbót..

- hægt er að nota þurrkaðar kryddjurtir. ó seisei já ! kaupi ítalska kryddjurtablöndu ef þið viljið bara kaupa eitt krydd en annars getið þið keypt ykkur þurrkað oregano og þurrkað timian til þess að stýra betur bragðinu. þurrkuðu kryddblöndurnar eru samt bara alveg asskoti fínar 

-Elda mikið og frysta svo ! Setja sósuna í box og frysta og þann dag sem þú nennir ekki að elda þá er að taka sósuna, setja í ölbylgjuofninn og sjóða pasta á meðan. 

enjoy ! 

Svefnpoki eða kuldagalli ?

Allt virðist nú vera orðið til. En ég verð að viðurkenna að þessi hugmynd er geðveik cool! 

Þetta gæti alveg verið málið í útilegum eða á útihátíðum þegar maður sér fólk liggjandi úti sem komst ekki í svefnpokann sinn áður en það sofnaði eða þegar allir sitja í stólum fyrir utan tjöldin vafðir inní svefnpoka í íslensku sumar/kulda-veðri

meira er hægt að skoða og lesa um þetta hér

Gagnsemi þessa galla fram yfir svefnpoka má einnig sjá í þessu skemmtilega videoi :)