Kjúklinga Tikka Masala

Mér finnst Tikka Masala alveg gríðarlega gott, well, reyndar finnst mér indverskur matur alveg gríðarlega góður. Sérstaklega eftir að hafa búið í Bretlandi. Þar er nefnilega ótrúlega vinsælt að fá sér "Curry" (indverskan mat) og eru bresk "curry" alveg svakalega góð (hvað er viðeigandi að setja mörg lýsingarorð í eina málsgrein? ;) )

Eins og í Butter Chicken uppskriftinni minni, þá eru margar tegundir af kryddi í þesum rétt... Því miður eiginlega.. Því að það er það sem stoppar mann vanalega í að gera réttina.
En...
Ef maður er búinn að koma sér upp þessum kryddlager einu sinni, þá mun hann vera til næstu ár og þess vegna engin spurning að kaupa sér þessi krydd og byrja að prufa :)

Ég er sjálf ekkert gríðarlega spennt fyrir réttum sem þarf að eyða 2 dögum í að gera, en eftir að hafa lesið mér til um það, þá skiptir miklu máli að kjúklingurinn marinerist í leginum í sólarhring, svo sorrý... þennan rétt þarf að byrja að undirbú deginum áður :) Það jákvæða við að byrja á að undirbúa þennan rétt deginum áður er sérstaklega snúið að mömmum með lítinn tíma eða bara fólki með lítinn tíma yfir höfuð, þar sem það er frekar lítið sem þarf að gera daginn eftir og því hægt að nota tímann í að undirbúa annað meðlæti án þess að allt sé farið í hvolf í skipulaginu.

(þetta er fullkomið í matarklúbbinn eða þegar þið fáið gesti í mat.... svoldið öðruvísi en þetta klassíska sem maður gerir vanalega, nautakjöt eða lambakjöt. Einnig má frysta þennan rétt og það er gott að eiga nokkra skammta inní frysti þegar lítill tími er til að elda)

ok... þessi er ekki hluti af hvernig eigi að gera Tikka Masala. Þetta er hins vegar svakalega þreytt Árdís Rún á leiðinni að fara að sofa þegar ég gerði kryddlöginn

Blandið kryddunum saman við jógúrtið

Hellið yfir kjúklinginn

Raðið kjúklingnum uppá pinna og eldið undir grillinu í ofninum (ekki hafa áhyggjur ef þeir eru ekki alveg eldaðir í gegn þó þeir séu orðnir brúnir... þeir klárast þá að eldast í sósunni

steikið laukinn við lágan hita í 5 mín 

bætið paprikunni útí 

bætið Garam masala útí

Takið kjúklinginn af teinunum og blandið saman 

Hellið tómatasafa útí 

Sjóðið við 30-60 mínútur. Bætið rjómanum saman við rétt áður en lagt er á borð og hleypið suðunni upp

Pappadums 

Naan brauð

Uppskrift

fyrir 6 

Dagur 1

1 kg kjúklingakjöt, skorið í bita 

8 hvítlauksrif 

5 cm bútur af engifer 

2 tsk salt 

1 tsk svartur pipar 

1 tsk Cayenne pipar (ég átti bara Chili pipar) 

2 tsk Cumin 

2 tsk Garam Masala 

Safi úr einni lime 

2 dósir af hreinni jógurt

Dagur 2 

Sósa: 
1 laukur 
2 tsk paprika 
1 tsk Garam Masala 
2 msk smjör 
2 dósir af tómata sósu í dós
500 ml rjómi 
Auka salt ef þarf
Kóríander til að bera fram með 

Veisla! 

Aðferð: 
dagur 1 
-Notið 1 kg af einhverskonar kjúklingakjöti. Getið úrbeinað kjúkling sjálf, keypt kjúklingabringur eða gert eins og ég, úrbeinað kjúklingalæri. Þau eru tiltölulega ódýr miðað við bringurnar en kjötið er mjög mjúkt og bragðgott. Munið bara að taka skinnið af og snyrta kjötið vel, enda oft frekar mikil fita á lærunum. 1 kg eru ca 3 bakkar af lærum. Bitana hef ég fremur smáa en stóra. Bara svo að það se auðveldara að borða bitana. Hef þá ekki stærri en venjulegan Flúða-svepp að stærð. 
-Þegar búið er að skera niður kjötið, blandið þá öllu saman sem er á listanum hér fyrir ofan. Hvítlauksrifin og engiferinn  finnst mér lang best að rífa með svona Microplane rifjárni, en auðvitað notið þið gömlu og góðu hvítlaukspressuna ef þið eigið hana og saxa niður engiferinn. Þið megið samt íhuga að kippa svona rifjárni með ef þið sjáið það einhversstaðar á verslunarleiðangri. Þetta er snilld fyrir engifer, hvítlauk og parmesanost. 

Blandið öllu saman í skál og hellið yfir kjúklinginn. Setjið inní ískáp og geymið þar til daginn eftir

dagur 2 

-Takið kjúklinginn og þræðið hann uppá grillpinna (einnota eða fjölnota). Kveikið á grillinu á ofninum ykkar og spreyið yfir kjúklinginn með non stick spreyi (til að brúna hann betur). Raðið pinnunum á bökunarplötu og "grillið" kjúklinginn þar til hann brúnast (snúið 1-2x)  (ef þið nennið, endilega skellið kjúklingnum á grillið úti... ég nennti því ekki :) ) - restina af kryddleginum hendið þið.

- Steikið á pönnu við vægan hita í smjörinu fínt saxaðan lauk í 5 mín. Steikið svo með lauknum paprikuna og Garam Masala. 

-Bætið kjúklingnum saman við og hellið svo tómatasafanum útí og sjóðið við vægan hita í 30-60 mín. 

-Rétt áður en þetta er lagt á borð, bætið 500 ml af rjóma við og látið sjóða smá aftur. 

-Saxið niður ferskan kóríander, stráið yfir og bjóðið svo upp á auka kóríander með í skál fyrir þá sem vilja mikinn kóríander. 

Meðlæti: 

Naan brauð 

Hrísgrjón 

Pappadums með Mango Chutney 

Og ef þið hafið ekki hugmynd um hvernig þið gerið Pappadums þá er myndband hérna ;)

(ég nota samt MUN minni olíu en er sýnt og sný frekar kökunum við)

Það eru ekki allir sem kunna bestu aðferðina við að sjóða hrísgrjón. Ég læt því aðferðina fylgja með :) 

(fyrir 6) 

500 ml hrísgrjón

1000 ml vatn 

smá salt

Setjið í pott með loki og látið sjóða í 3-4 mínútur. Slökkið undir pottinum og EKKI... já EKKI voga ykkur að opna pottinn aftur fyrr en eftir 20 mínútur. Já og EKKI taka pottinn af hellunni! :) 

Svona fáið þið fullkomin hrísgrjón sem brenna ekki við og þarf ekki að hella auka vatni af. 

simple as that! ;) 

ENJOY ! ;) 

Súkkulaðibitakökur (Subway kökur)

Í síðustu viku bloggaði ég um Kókoskökur... Ég var eiginlega byrjuð að gera Súkkulaðibitakökur þegar ég fékk hugmyndina af Kókoskökunum og endaði því að gera hvorugtveggja.

(Ath að ég á lika uppskrift af stökkum Amerískum súkkulaðibitakökum hér)

Eins og með Kókoskökurnar, þá er þetta afskaplega fljótgerð uppskrift og að flestu leiti gerð eins og Kókoskökurnar

(ég nota sömu myndirnar hér og í Kókoskökunum... why? well... af því bara. Þetta er í raun of líkt að ég nennti ekki að mynda þetta tvisvar) :)

sykur og smjör þeytt saman

lítur þá svona út 

eggi bætt við og þeytt smá

blandan breytist þá svona og verður ljósari og léttari

þurrefnunum blandað saman við 

kökurnar nýkonar úr ofninum... alltaf er það einhver sem stelur ser bita? !  ;)

Uppskrift (gerir 20-22 kökur)

(1 bolli eru 2.5 dl)

115 gr smjör (við stofuhita) 

1 bolli sykur

1 bolli púðursykur

1 egg 

2 tsk vanilluextract (eða vanilludropar)

2 bollar hveiti

1 tsk matarsódi

1/2 tsk salt

2 bollar súkkulaðibitar 

Aðferð

-Þeytið saman sykurinn og smjörið í handþeytara og bætið þarnæst eggjunum saman við einu og einu i einu auk vanilluextracts. 

-Setjið þurrefnin saman við, fyrir utan súkkulaðið og blandið vel saman. Hægt er að gera þetta í handþeytaranum eða með sleif. 

-Blandið súkkulaðinu saman við með sleif.

-Rúllið deiginu með höndunum og mótið kúlur á stærð við golfkúlur og raðið 12 saman á plötu, sem er ósmurð og ekki með neinum smjörpappír (ekki fríka út, þær festast ekki við). 

-Bakið við 180°C í 10-12 mín eða þar til þær eru búnar að fletjast vel út og orðnar brúnar í könntunum. 

-Látið kólna aðeins og borðið með ííískaldri mjólk. :) 

Punktar

-Bestu súkkulaðibitarnir fást í pokum í Kosti eða á Amerískum dögum í Hagkaup. Það er auðvitað hægt að nota suðusúkkulaði og brytja það gróflega niður

-Hægt er að bæta valhnetum útí

-Hægt er að bæta karamellukurlinu frá Nóa saman við 

Kókoskökur

Ég rölti oft Laugaveginn með Árdísi í vagninum a góðum dögum og oftar en ekki stoppa ég við á Te og Kaffi til að kaupa mér kaffi. Á mjög góðum dögum þá kaupi ég mér stóra kókosköku, sem er eins og Amerísk Súkkulaðibitakaka, ekki með neinu súkkulaði, heldur með kókos. Krispí og stökkir endar með mjúkri og seigri miðju... naaaammm!!

Ég ákvað í gær, þegar ég var að baka mínar venjulegu Amerísku súkkulaðibitakökur (þessar mjúku - uppskriftin kemur síðar) að ég myndi prufa að gera kókoskökur.

dare to say

þær eru awesome !

ég að vísu hef þær um helmingi minni en Te og Kaffi kökurnar, þær eru riiiiisa stórar.
En hvað bragðið varðar... þá eru þær mjög close (og næstum því alveg eins!)


fyrir utan hvað þær eru góðar, þá er kostur nr 2 sá að það tekur afskaplega lítinn tíma að gera kökurnar. Þær eru í kringum 10 mín í ofninum og ef allt hráefnið er til staðar, þá tekur um 10-15 mínútur að gera uppskriftina

Smjör og sykur sett í skál

þeytt saman

eggi bætt við 

þeytt aftur

þurrefnin ofaní 

þurrefnum blandað saman með sleif

tilbúið :) 

kúlur mótaðar í höndunum. Á stærð við golfbolta 

nei.. það er ekki búið að bíta í eina kökuna *hóst* 

Uppskrift:
(gerir um 18-22 kökur, fer eftir stærð)
(einn bolli eru 2.5 dl)

115 gr smjör 

1/2 bolli púðursykur

1/2 bolli sykur

1 egg

1 1/4 bolli hveiti
1/2 tsk matarsódi
1/4 tsk salt
1/2 tsk vanilluextract (eða vanilludropar)
1 1/3 bolli kókosmjöl

Aðferð:
-Þeytið saman smjör og sykur (púðursykur og sykur) í handþeytara. Bætið svo egginu við og þeytið þar til blandan hefur lýst og tekið í sig svolítið loft.
-Bætið öllum þurrefnunum + vanilluextractinu saman við með sleif þar til að þetta er vel blandað saman. Ef þið viljið, þá getið þið flýtt fyrir með því að nota hendurnar.
-Móti kúlur með höndunum, á stærð við golfkúlur og setjið á ósmurða bökunarplötu (nei engan smjörpappír heldur :) ). Passið að hafa bil á milli þar sem kökurnar renna út. Mér finnst passa ágætlega að setja ekki fleiri en 12 kökur á plötu.
-Bakið við 180°C í 10 mínútur (+/- 2 mínútur) eða þar til kökurnar eru að hluta til karamellubrúnar. Takið þær þá út og látið kólna. Þær munu falla svoldið niður, en það er í lagi :)

enjoy  ! :)

Súkkulaðimuffins

Jæja. Fæðingarorlofinu frá blogginu er formlega lokið :) 

Dóttirin er fædd, hávær, sæt og yndisleg og var skírð síðustu helgi og heitir núna Árdís Rún :) 

Já, ég veit, ég hef hingað til notað uppskriftina af Djöflatertunni sem er hérna á síðunni og gert súkkulaði muffins úr henni. 

En stundum hefur mér fundist hún vera svoldið þurr og dottið í sundur sem muffins.

hér er því endurbætt útgáfa sem passar akkúrat í 12 riiiisamuffins :)

þeytið vel saman smjör og sykur. Hérna er ég svo búin að þeyta eggjunum einu og einu útí í einu og þá lítur blandan svona út 

öll þurrefnin sett vigtuð og mæld í eina skál. Skellt saman við smjörhræruna og súrmjólk bætt við á sama tíma 

Hræran tilbúin til að setja í form. Hér mætti blanda grófsöxuðu súkkulaði saman við

sett í stór muffinsform... og þau næstum alveg fyllt. Ath að það þarf að vera með muffinsmót undir formunum, annars fletjast þau út í ofninum

ok, það er alveg smá sjéns að þetta sé girnilegt óbakað?

ofan á hverja múffu setti ég gróftskorið súkkulaði 

halelúja!!!

Uppskrift 

(gerir 12 risastórar muffins eða 24 minni) 

Einnig hægt að gera súkkulaðiköku eða skúffuköku. Passar í 2 hringlaga form eða skúffukökuform 

170 gr smjör

300 gr sykur

2 tsk vanilluextract

3 egg

270 gr hveiti

1 tsk matarsódi

2 tsk lyftiduft

70 gr kakó

2.5 dl léttsúrmjólk (eða súrmjólk þynnt með smá mjólk

Aðferð

-Þeytið saman smjör og sykur þar til blandan er vel blönduð og hefur lýst. Blandið saman eggjunum einu í einu saman og þeytið mjög vel þar til blandan er loftmikil og ljós

-Bætið öllum þurrefnunum saman og súrmjólkinni. Hrærið í 1 mínútu þar til blandan er vel blönduð saman

-setjið í stór muffinsform (fást í www.alltikoku.is eða þið getið klippt smjörpappír í ferninga og sett í muffinsmót)

-Bakið í miðjum ofni við 180°C í 30-40 mínútur. 

punktar: 

-Geymast gríðarlega vel 

-Bætið 2 dl af grófsöxuðu sukkulaði útí ef þið viljið súkkulaðibita 

-Getið gert súkkulaðikremsfyllingu: Gerið súkkulaði ganache (150 gr rjómi + 150 gr súkkulaði brætt saman, látið kólna aðeins og sprautað inni hverja muffins... mmm

njótið

Sveppa Ragú

Oft er maður svoldið týndur í ákvarðanatöku á meðlæti með steikum. 

Mér finnast sveppir vanalega passa mjög vel við öllu kjöti og geri því stundum sveppa ragú til að hafa með sem meðlæti. Auðvelt, hægt að gera daginn áður (þarf þá reyndar að bæta við smá rjóma þegar það er hitað upp) og mjög bragðgott. 

Sveppir steiktir í smá smjöri og olíu 

Bætt smjöri og lauk við 

búið að sjóða niður vökvann og bæta við rjómanum. 

                           

Uppskrift

Gerir u.þ.b. 1.5 bolla 

2 msk smjör

1 msk matarolía eða ólífuolía 

1 askja Flúðasveppir (250 gr)

1/2 bolli þurrkaðir porcini sveppir (fást t.d. í Hagkaup en einnig má nota aðrar þurrkaðar sveppablöndur/tegundir)

1 skarlottulaukur 

3 msk  rauðvín eða matarrauðvín 

1 msk ferskt timian eða 1 tsk þurrkað 

1 msk fersk steinselja eða 1 tsk þurrkuð 

150 ml rjómi 

salt 

pipar 

Aðferð

-Leggið þurrkuðu sveppina í bleyti í 1 bolla af heitu vatni og látið standa. 

-Sneiðið Flúðasveppina niður

-Steikið Flúðasveppina 1 msk af smjöri + 1 msk olíu og saltið aðeins til þess að fá vökvann úr þeim. Steikið þar til þeir eru farnir að brúnast aðeins eða í um 5 mín á miðlungsháum hita.

-Bætið 1 msk smjöri útí pönnuna og setjið fíntsaxaðan skarlottulaukinn útá og steikið áfram í 5 mínútur. 

-Saxið þurrkuðu sveppina gróflega, geymið vökvann sem þeir lágu í. 

-Látið út á pönnuna, steinselju, timian, rauðvín og 3 msk af vökvanum sem sveppirnir lágu í (ath, passið ykkur að oft er smá sandur í svona sveppum sem verður eftir í vökvanum svo best er að fleyta ofan af vökvanum til að sleppa við að bryðja sand)

-Sjóðið blönduna niður þar til vökvinn er allur uppgufaður. 

-Bætið útí 150 ml rjóma og sjóðið þar til blandan verður glansandi og falleg :) Saltið og piprið. 

Crème brûlée / Creme Brulee

Eftirrétturinn með skrítna nafnið :) 

Í rauninni þýðir Crème brûlée - Brenndur rjómi og er með einfaldari eftirréttum sem hægt er að gera. Það eina sem stöðvar fólk vanalega í að gera hann er það að það þarf sérstakan gasbrennara til þess að brenna sykurinn ofaná sem gerir þessar geðveikt góðu og stökku sykurskel ofan á vanillu, rjóma, sykurs og eggjarauðublöndunni. 

Þessir gasbrennarar fást t.d. í DUKA og Kokku. Þegar ég keypti minn brennara athugaði ég líka bílavarahlutabúðir en komst að því að þeir voru ódýrari í búðum eins og DUKA og Kokku. Ég mæli samt að sjálfsögðu með því að fólk geri smá könnuna hvar ódýrustu gasbrennarnir fáist þar sem þetta er nú ekki flókið tæki og þarf ekki að vera það fínasta fína til að það geri sitt gagn :) Auk þess er þetta væntanelga ekki neitt sem er það mikið notað að það borgi sig að borga 10 þús fyrir gripinn.
Einhversstaðar las ég að það ætti að vera hægt að brenna sykurinn með því að setja formin undir brennandi heitt grillið á bakaraofni. Ég hef sjálf ekki prufað það og get ekki annað en ímyndað mér að það hiti Creme brulee-ið of mikið... Ef einhver hefur prufað þá má hann svo sannarlega deila árangrinum með okkur :)

Rjómi og vanilla sett í pott og suðan látin koma varlega upp. Lækkað undir og látið standa við suðu í 5 mínútur 

Eggjarauður og sykur 

Eggjarauður og sykur þeytt þar til létt og ljóst, í um 2-3 mínútur. lítur út eins og þykkt vanillukrem þegar þetta er tilbúið. Svo er vanillubaunin tekin úr rjómanum og rjómanum helt útí í ca 20-50 ml skömmtum og þeytt á meðan. Mestu skiptir að fyrstu rjómaskammtarnir fari sem hægast útí svo þeir eldi ekki eggin og þau hlaupi. 

Sett í form 

Formin sett inní ofn í eldföstu formi eða djúpri ofnplötu og sjóðandi heitu vatni hellt í formið.  Best er að setja vatnið í formið EFTIR að þið eruð búin að setja allt inní ofn til þess að forðast óhapp með skvettur :)

(uppskriftin var nóg í 3 form en ég setti 1/2 skammt í 2 form svo við gætum gætt okkur á smá Creme Brulee daginn eftir)

Þegar búið er að baka Crème brûlée-ið og það hefur kólnað setjið sykur yfir og brennið! 

njótið ! 

Ath myndirnar eru af hálfri uppskrift en hér fylgir heil uppskrift fyrir 6 form 

Uppskrift 

fyrir 6 

600 ml rjómi 

1 vanillubaun

6 eggjarauður 

1/2 bolli sykur 

+6 msk sykur

Aðferð: 

-Kljúfið vanillubaunina með beittum hníf og skrapið úr henni vanillufræin. Setjið þau auk, vanillubaunina og rjómann saman í pott og hleypið upp vægri suðu. Látið malla við suðu í um 5 mín. Á meðan þeytið þið eggjarauðurnar og sykurinn 

-Takið eggjarauður og sykur og þeytið vel í 3 mínútur. Hellið svo heitri rjómablöndinni hægt útí og þeytið á meðan. Í fyrstu þurfið þið að fara afar varlega svo þið eldið ekki eggin en undir lokin má setja rjómann aðeins hraðar útí 

-Takið 6 eldföst mót. Mín eru hringlaga og grunn, sumir nota souffle form en ég kýs að nota grynnri form. Ef þið eigið bara souffle form then go ahead :) Hellið eða ausið rjómablöndunni í formin og bankið svo hverju formi létt í borðið til að losa um loftbólur. 

-Raðið formunum í eldfast mót sem rúmar formin eða setjið í djúpt fat / ofnskúffu sem hægt er að hella vatni í 

-Látið heitt vatn renna, setjið í könnu og hellið varlega í mótið svo vatnið umleiki öll formin og nái uppá miðjar hliðar creme brulee formanna. Best er að gera þetta þegar mótið með formunum er komið inni ofn svo þið farið ekki að svetta öllu um koll við að setja mótið inní ofninn :) 

-Hafið ofninn stilltann á 150°C. Bakið í um 25-30 mín í miðjum ofni ef þið eruð með grunn form eins og mín en með souffle mót skulið þið reikna með um 45 mín. Það er í lagi að Creme brulee-ið dansi til þegar þið takið það úr ofninum.

-Kælið í ískáp þar til alveg kalt (geymist vel í ísskáp og má gera allt að 3 dögum fyrr ef þið viljið). Áður en þið brennið sykurinn ofan á, látið það taka aðeins hita aftur í sig og takið það um 1/2-1 klst fyrr útur ískápnum. 

-Setjið eina matskeið af sykri yfir hvert form og brennið með gashitara. Berið á borð strax. (ef sykurinn er látinn standa of lengi á þá bráðnar hann aftur)

Enjoy ! :) 

Áramótamaturinn 2012