Pestókjúklingur

Vinkona mín hnippti í mig um daginn og sagði við mig "Ragna, það er MÁNUÐUR síðan þú bloggaðir síðast!" og það er eru þó nokkrir dagar síðan hún sagði þetta við mig.

óó

ég hef haft alveg skelfilega góða ástæðu fyrir bloggleysi sem mun koma fram fyrr en síðar

En... vitiði hvað. Þó svo að eg muni kannski ekki koma með þessa feikna-góðu ástæðu strax þá mun bloggum fjölga aftur núna :)

Bloggið í dag er eitthvað sem ég hef gert í mörg mörg ár en hefur þó auðvitað tekið einhverjum breytingum :) Nú er ég farin að krydda kjúklinginn meira áður en ég steiki hann og auðvitað er allt betra með hvítlauk og þess vegna er hann farinn að sjást með :)

Steikið bringurnar í olíu á pönnu þar til þær eru örlítið brúnaðar á hvorri hlið. Kryddið þær og makið hvítlauknum á þær áður en þær fara í pönnuna (snyrtið þær einnig eins og það virðist oft þurfa að gera, þ.e. takið fitu og himnur í burtu)

raðið bringunum í eldfast mót. Mér finnst betra að hafa þær ekki í allt of stóru móti því að þá er auðveldara að ausa upp olíunni/sósunni uppúr botninum 

setjið eina matskeið af grænu pestói á hverja bringu. Ekki dreifa um of úr pesóinu þa sem það mun annars leka útaf.
Bakið bringurnar í 15 mínútur í 180°C ofni og takið þær þá út, smyrjið pestóinu yfir bringuna (olían hefur lekið mikið til úr pestóinu og það er nú þurrara) og stráið eins mikið af rifnum osti og ykkur langar í. 

Inn í ofn aftur í 10 mínútur eða þar til osturinn er bráðnaður og aðeins farinn að brúnast (ég vil hann ekki of brúnan eða stökkan í þessum rétt) 

berið fram með salati og kúskús 

borðið ..
mmmm!!!

Uppskrift:
Fyrir 4 


4 kjúklingabringur
ítölsk kryddblanda
2 hvítlauksrif, rifin eða kramin
Salt og pipar
grænt pestó um 4 msk
rifinn ostur að eigin vali

Aðferð: 
-Snyrtið kjúklingabringurnar, kryddið þær með ítölsku kryddi, salti, pipar og makið hvítlauknum yfir bringurnar báðum megin.
-Steikið bringurnar á pönnu, báðum megin í 2-3 mínútur eða þar til þær eru aðeins farnar að brúnat (þetta gæti einhverjum fundist óþarft og þið megið vel sleppa þessu :) )
-Setjið bringurnar í eldfast mót og setjið eina msk af grænu pestói yfir hverja bringu og setjið inn í heitan ofn á 180°C í 15 mínútur. Takið þá bringurnar út, dreifið úr pestóinu og stráið ost yfir og bakið aftur í 10 mínútur eða þar til osturinn er bráðinn og byrjaður að verða gullinn og auðvitað ath ef þið eruð ekki viss hvort að bringurnar séu ekki örugglega tilbúnar :) Það á að koma safi úr þeim en hann á ekki að vera ljósbleikur. Glær safi er perfect en enginn safi þýðir ofeldaðar bringur :)
-útí búð fást orðið fjölda margar tegundir af kúskús með ýmsum bragðtegundum. Endilega veljið það sem ykkur langar mest í (við vorum með villisveppa kúskús) eða takið ókryddað kúskus og setjið grænmetistening út í vatnið sem þið eldið það í. Ef þið hafið ekki gert kúskús áður þá skulið þið ekki hræðast það. Það er í rauninni ekkert flóknara en að sjóða rétt magn af vatni á móti réttu hlutfalli af kúskús, slökkva undir pottinum, hella kúskúsinu útí og bíða þar til maturinn er tilbúinn.
-Salatið sem var gert þennan daginn var gert úr íslensku spínati, heimaræktaðri steinselju sem ég á svo mikið af þessa dagana, balsamic-basilikudressingu og parmesan (sem mamma og pabbi komu með frá Ítalíu um daginn)
-Sósu þarf ekki með fyrir þennan rétt þar sem hægt er að nota olíuna sem kemur úr pestóinu til þess að ausa yfir kjúklinginn.


enjoy ! :)

Amerískar, stökkar súkkulaðibitakökur

oh já, þessar eru svo góðar.
Reyndar hef ég nokkrum sinnum gert aðra uppskrift sem er mun flóknari, en það þarf að bíða hátt í 3 daga þar til maður má nota degið sem er látið vinna einhverja töfra í ísskáp allan þann tíma. Verð að viðurkenna að vanalega er biðin þess virði enda var sú uppskrift kosin sú besta í New York Times tímaritinu af hópi tilraunakokka sem prufuðu ótalmargar uppskriftir.

En..

Þessi hér er mjög góð og svakalega einföld og fljótgerð. Athugið að þetta er ekki klassíska "subway" kakan sem er hálfbökuð og blaut í miðjunni. Þessar eru bakaðar í gegn og stökkar og flottar. Afskaplega góðar með kaffi og geymast svakalega vel.

Fæ þessa súkkulaðibita í Kosti. Ekki stórir eins og fást í flestum öðrum búðum. Einnig er einnig hægt að taka upp hnífinn og saxa niður suðusúkkulaði :) 

Fyrir bakstur 

Eftir bakstur... mmm ! 

Uppskrift:
gerir 12-15 kökur
(1 bolli eru 2.5 dl)

230 gr smjör
2/3 bolli sykur
2/3 bolli púðursykur
2 egg
2.5 bolli hveiti
1 tsk matarsódi
1 tsk salt
1 tsk vanillu extract/dropar
2 bollar súkkulaðibitar

Aðferð:


-Sykurinn og smjörið er þeytt vel saman í þeytara og eggjunum bætt saman við einu og einu í einu þar til blandan hefur lýst töluvert.
-Þurrefnum og vanillu extract er bætt saman við og að lokum súkkulaðibitinum. Ath að ef þið eruð að nota handþeytara þá þarf vanalega að bæta súkkulaðibitunum saman við með sleif þar sem deigblandan er mjög mjög þykk.
-Sett á ósmurða og óklædda plötu, inn í ofn á 180°C í 9-12 mín. Tekið út, látið kólna aðeins og flutt svo yfir á grind þar sem kökurnar eru látnar kólna meira (eða ein lengi og þið getið beðið með að fá ykkur     eina)

Eplakaka - gamaldags

Hvar hef ég verið ? Þá það er nú góð spurning :)
Ég hef verið í útlöndum og mikið að vinna og voðalega lítið verið í frumlegum verkefnum í eldhúsinu.
Núna er ég hins vegar komin í sumarfrí og nýt tímans alveg í botn!

Hér kemur uppskrift af ekta "gamaldags" eplaköku eins og ömmur og mömmur gera (og núna við !).
Góða heitar með rjóma en geymast einnig gríðarlega vel og eru góðar til að taka með í ferðalög eða hafa í kaffitímanum.
p.s. Endilega gerið 2 kökur ef þið viljið ekki gera í skúffukökuformið og frystið aðra kökuna ! Hún er fljót að þiðna uppá borði og einnig hægt að flýta fyrir sér með því að senda hana í örbylgjuofninn ef gesti ber snögglega að garði

Uppskrift:
í tvö kringlótt form eða 1 skúffukökuform 

150 gr sykur
150 gr púðursykur
125 gr smjör
2 egg
1/2 tsk salt
1 tsk matarsódi
1 tsk lyftiduft
260 gr hveiti
70 gr kókosmjöl
2 tsk vanilluextract/dropar
2.5 dl mjólk

Ofaná:
2 epli, skræld, kjarnhreinsuð og skorin í nokkuð þunnar sneiðar.
kanilsykur að vild

Glans:
Apríkósu eða appelsínumarmelaði
hitað í örbylgju og svo penslað yfir á meðan kakan er enn heit.

Aðferð:
-sykur og smjör þeytt vel saman með handþeytara eða í hrærivél með K-járninu á. Eggjum bætt saman við einu og einu í einu og þeytt vel á milli og á eftir.
-allt sem eftir er í uppskriftinni er sett saman við og blandað saman við þar til vel blandað (ath að þeyta ekki um of).
-Sett í smurt form, eplin eru skræld, skorin í tvennt og svo í sneiðar og raðað á deigið, þarf ekki að þrýsta niður. Stráð kanilsykri yfir og bakað í 30-45 mín á 180°C (styttra ef þið setjið kökuna í 2 form)

kryddjurtaræktun 2012

fer vel af stað í ár.
Nokkuð þröngt er orðið um plönturnar í forsáningarbakkanum og satt best að segja bjóst ég ekki við að þær yrðu svona stórar áður en ég myndi setja þær út í júní. Er að velta því fyrir mér hvort ég ætti að taka svalapottana inn til að umpotta og prikla í þá og hafa þá inni þar til í júní þegar veðrið verður vonandi orðið stabilla og hlýrra. Eina vesenið við það að pottarnir eru stórir og fyrirferðamiklir og ekki mikið stofustáss :)

Basilikan er mjög falleg og stór og er ég farin að geta notað blöð af henni strax. Svo virðist sem að fræin sem Litla Garðbúðin er að selja séu kraftmikil og góð og upp kemur planta af hverju fræi að mér virðist :)

Mig langar einnig að benda ykkur á að pottarnir sem ég keypti í fyrra til að hengja á svalahandriðið og seldust upp á engum tíma í IKEA eru komnir aftur í IKEA. Hef ekki ennþá séð eða fundið betri útfærslu fyrir potta sem hanga framan á svölum þrátt fyrir þónokkra leit. 

Mynd frá 2011 

Það er ekki í boði fyrir mig að vera með potta inni á svölunum enda svakalega lítið pláss þar eins og þið sjáið. En þá er máli að nýta plássið vel og gera allt mjög kósí :) 

Nýja græjan

Eignaðist loksins svona græju í dag eftir þónokkra bið. 

Þið eruð kannski alveg gríðarlega hissa yfir því að ég hafi ekki keypt mér Kitchenaid? 

Ástæðan er einföld :)

Ég hef unnið mikið með bæði Kenwood og Kitchenaid og mér finnst Kenwood standa framar hvað varðar umgengni við vélarnar og gæði. Helsti plúsinn er hve mun sjaldnar maður þarf að opna vélina til að skafa úr hliðunum. 

Létt og holl súpa

Sumarleg og bragðgóð súpa :)

Tómatasúpa - uppskrift 

Grilltíminn að renna í garð

Þess vegna er tími til að rifja upp hvernig maður sparar smá pening í sumar og kryddar kjötið sjálfur :)

Auðvitað notið þið ekki endilega ferskar kryddjurtir þegar ykkar kryddjurtir eru ekki komnar út eða tilbúnar til notkunar :) Þær eru alveg ágætar þurrkaðar líka :)

Grillkjöt - uppskrift 

enjoy :)

Bláberjamuffins

Oh...
munið þið eftir þessum hérna ?

Bragðgóðar, mjúkar, með stökkum topp og fullar af safaríkum bláberjum ?

öhömm..

já hvort ég man !

Var að rifja upp þessa uppskrift og langaði að deila með ykkur :)

Bláberjamöffins - uppskrift 

enjoy :)

Kjúklingasalat

Það er vel við hæfi að setja inn uppskrift að sumarlegu og litríku salati á sumardaginn fyrsta. 

Ég hef átt þessa uppskrift í örugglega 10 ár, enda handskrifuð aftan á blað sem er merkt Halldórskaffi.  Að vísu er uppskriftin ekkert neitt undraverð eða sérstök, en það er gott að eiga uppskrift því að ég veit sjálf að maður getur verið hálf andlaus þegar maður ætlar að gera salat og endar á að henda hinu og þessu sem telst vera grænmeti ofan í skál og kallar það að lokum salat! :) 

Eins og þið sjáið, sumarlegt og fallegt salat 

                           

og það er ekkert verra að setja smá kjúkling út á salatið :)

hollt og fallegt? það passar vel saman

Uppskrift 

Fyrir 4-6

3-4 kjúklingabringur 

2 msk matarolía

1 hvítlauksrif

1 tsk karrý

salt og pipar 

1/2 haus jöklasalat eða önnur salatblanda 

1/4 blaðlaukur

1 rauð paprika

1 askja jarðarber

1/4 kantilópa (melóna)

1 mangóávöxtur

1/2 bolli furuhnetur 

-Kjúklingabringa skorin í strimla, látin í skál með matarolíu, hvítlauksrifi (mörðu eða rifnu), karrý og salt og pipar. Steikt á pönnu þar til tilbúið

Salat, blaðlaukur, paprika, jarðarber, mangó og melóna skorin niður og blandað saman í skál. Kjúklingnum dreift yfir salatið. Furuhneturnar er ristaðar á pönnu og settar yfir salatið

Borið fram með góðu brauði og mangósósu

Ég notaði einnig Kress-spírur sem ég hef verið að rækta hérna heima. Þær eru mjög hollar og afskaplega góðar í salat, með smá dijon sinnepsbragði fannst mér. Þær fást hér: www.litlagardbudin.is og ætti að vera á færi flestra að rækta svona heima :) 

Mangósósa: 

1 stk mangó 

1 dl appelsínusafi 

3 msk hrísgrónaedik

1/2 tsk dijon sinnep

1 tsk hunang 

1 tsk sesamolía 

Mangó skorið í bita og sett í mixer. 

(ath, að þar sem ég ákvað samdægurs að gera þetta salat um daginn, þá var mangóið ekki nægilega mjúkt til að ná sósunni alveg eins smooth og vanalega gerist. En hún bragðast eins. Ekki láta það stoppa ykkur :) )

enjoy ! :)

Hamborgarar

Fyrstu hamborgarar sumarsins voru gerðir í dag og jafnframt grillaðir ! 

Hér er uppskrift að heimagerðum hamborgurum :)

Enjoy