Appelsínukaka með rabbabara

Þó svo að það sé enn miður ágúst er haustið farið að narta ansi í kinnarnar á manni.

Í mikilli rigningu og haustlegu veðri um daginn og við mæðgurnar enn í sumarfríi og afráðið var að baka köku.

Þessi kaka er mjúk, ekki þurr og skemmtileg tilbreyting frá rabbabarakökum sem maður er vanur að fá :)

Uppskrift: 

125 gr smjör
200 gr sykur
2 egg
1 tsk vanilludropar/extract
raspað hýði af 2 appelsínum
300 gr hveiti
2 tsk lyftiduft
1/2 tsk matarsódi
300 gr rabbabari
125 ml mjólk

Aðferð: 

-þeytið saman í hrærivél eða handþeytara smjör og sykur þar til það hefur lýst.
-Bætið við eggjum, einu og einu í einu og þeytið mjög vel á milli. Þeytið áfram í um 2 mín eftir að seinna eggið er komið útí.
-Bætið við appelsínuberkinum og vanilludropunum og blandið saman
-Setjið útí hveiti, lyftiduft, matarsóda og mjólk og hrærið saman þar til að þetta er orðið að samfelldu deigi. Ekki hræra lengur en mögulega þarf
-Setjið deigið í kringlótt smelluform sem er spreyjað eða smurt.
-Stráið niðursöxuðum rabbabara yfir kökuna og bakið hana við 180 °C í 45-50 mín eða þar til hún er bökuð í gegn.
-Æðisleg volg með rjóma eða ís.


 

Punktar 

-það er vel hægt að sleppa rabbabaranum, kakan er gríðarlega góð án hans. Væri hægt að gera glassúr úr appelsínusafa, appelsínuberki og flórsykri
-ég á alltaf niðursaxaðan rabbabara í pokum í frysti. Það er ekkert mál að nota frosinn rabbabara í rétti eða til að gera rabbabaragrauta, sultur ofl yfir allt árið

Sinnepskjúklingur með rósmarín og hvítlauk

Ég get ekki sagt að ég sé matvönd... ég borða svona flest allt nema ég á afskaplega erfitt með að borða paprikur og bleikan fisk. Paprikan er þó skömminni skárri og ég borða hana ef hún er í réttum. . . Ég kýs hins vegar oft að reyna að sleppa henni í minni matseld. 

Eitt bragð sem ég hef upp á síðkastið verið að meta betur og betur er sinnepsbragð. 

Hef að vísu alltaf fundist brúna SS sinnepið gott og gult sætt sinnep verið allt í lagi. 

Eftir að ég uppgötvaði hvað dijon sinnep er gott hef ég verið að prufa ýmsar gerðir og lauma því orðið í ótrúlegustu rétti. 

Um daginn var á vegi mínum sætt dijon sinnep (hunangsdijon) sem ég setti á kjúklingabringur.
Ó my hvað það er gott saman með smá rósmarín og hvítlauk. 

Hef hingað til frekast átt til að setja dijon sinnep á svínakjöt eða lambakjöt en einhvernveginn látið það að mestu vera að setja dijon sinnep útí kjúklingarétti. 

Mér fannst tilvalið að nota sæta dijon sinnepið útá kjúkling til að yfirtaka ekki alveg hið milda bragð kjúklingsins og bætti svo rósmaríni og hvítlauk með. Þessi þrennar klikkar ekki, á hvað sem er.

Endilega prufið að setja dijonblönduna á lambakjöt! 

Hef núna gert þennan rétt nokkrum og verð því að deila honum með ykkur :) 

Það góða við þennan rétt er að hann er 

a) fljótlegur 

b) þarft ekki að eiga mikið til þess að setja hann saman

kryddlögurinn útbúinn

Litli aðstoðarkokkurinn lætur sig sjaldan vanta 

Fyrir ofn 

Eftir ofn 

Uppskrift 
fyrir 3 

3 kjúklingabringur 

3 msk sætt dijon sinnep - hunangsdijon (venjulegt dijon virkar einnig)

2 hvítlauksrif, saxað smátt, rifið eða pressað 

1/2 - 3/4 msk Seasoned salt (t.d. Heima, Lawry's, Season all)
1/4 msk þurrkað rósmarín eða 1 msk ferskt, saxað smátt

3 sneiðar beikon 

Aðferð: 
-Setjið saman í skál dijon sinnep og krydd
-Smyrjið ríkulega yfir kjúklingabringurnar allan hringinn
-Vefjið beikoni utanum eða leggið yfir bringurnar
-Eldið í ofni á 190°C í um 30-35 mínútur (ath, fer mikið eftir stærð bringanna og hvort þær séu nýkomnar úr ískápnum eða ekki. Athugið þess vegna reglulega hvenær þær eru tilbúnar)


Tillaga að meðlæti
-Ofnbakaðar sætar kartöflur
-Soðnar gulrætur
-Salat
-CousCous 

Enjoy :) 

Pítubrauð

Það tekur ekki langan tíma að gera pítubrauð. Það passar vel að henda því í skál þegar heim er komið eftir vinnu og svo kíkja á það aftur um 20 mín áður en maturinn á að fara á borðið. :) 

Fyrir utan hve æðislega gott að fá nýbakað pítubrauð þá er rosalega gaman þegar maður er með lítil börn að geta gert litlar pítur fyrir þau :)

Allt hráefnið

Aðstoðarkokkurinn raular orðið með mömmu sinni 

skipt í 8 kúlur 

Flatt út. Ath ekki hafa brauðin of stór.

Uppskrift: 
gerir um 8 pítur

500 gr hveiti
1,5 tsk salt
2 msk matarolía
1 poki þurrger
2 msk sykur
ca 250-300 ml volgt vatn

Aðferð
- Setjið hveiti, salt, matarolíu, þurrger, sykur og vatn saman í skál og hnoðið annað hvort í höndunum  á borði eða með hrærivél í 8 mínútur (hér má eiginlega ekki gefa afslátt á mínútum :) )
- Setjið deigið í skálinni á volgan stað (eða ofan í volgt vatn í eldhúsvaskinum) og breiðið viskastykki yfir. Látið hefast í 40-90 mín. (Fer eftir hve heitt er þar sem deigið hefast)
-Skiptið deiginu í 8 búta og gerið píturnar einar í einu með kökukefli og raðið 3-4 saman á pappírsklædda plötu og setjið inní ofn á.
-Verið búin að hita ofninn uppí 200°C og bakið píturnar á einni eða tveimur plötum (ef 2 plötur stillið þá á blástur) og bakið við 5-7 mínútur. Þær eiga að blása vel upp. Ef þær blása ekki vel út þá getur verið að ofninn sé ekki nógu heitur eða þið eruð með píturnar of stórar. Það er ágætt að miða við pítubrauðin sem fást í öllum helstu búðum.

Setjið það álegg sem ykkur lystir í pítuna ykkar

mmmmmmm

gjörið svo vel :)

Sítrónuterta með kremi

Æðisleg kaka, geymist frábærlega og er svo mjúk og fersk á bragðið að það er erfitt að hætta! 



Eitt er örugglega nýtt fyrir ykkur við gerð þessarar köku. Það er að til þess að ná fram þessu æðislega sítrónubragði bæði í kreminu og kökunni sjálfri er að þið notið heila sítrónu (já hýði og allt) sem þið hafið soðið og svo maukað

Ég giska á að munnvatnskirtlanir ykkar séu á fullu akkúrat núna :)

Skolið sítrónuna vel og sjóðið hana í 20 mínútur 

Vigtið öll þurrefnin saman 

Skerið sítrónuna í 2 helminga og fjarlægið alla steina sem þið sjáið

Maukið sítrónuna (alla) í matvinnsluvél, með töfrasprota eða í mixer, látið blönduna kólna áður henni er hrært saman við deigið 

Setjið þurrefni, egg, mjúkt smjör og 2/3 af maukuðu sítrónunni saman í skál 

Hrærið saman í 2-3 mínútur á hægum hraðaa þar til þetta er komið vel saman

Setjið í 2 kökuform sem eru spreyjuð með non-stick spreyi

Uppskrift
2 botnar

1 sítróna (notið 2/3 af maukinu í deigið)

275 gr mjúkt smjör 

290 gr sykur

290 gr hveiti 

1 tsk lyftiduft

2 tsk matarsódi 

4 egg 

Krem 
50 gr mjúkt smjör

250 gr rjómaostur 

1/3 af maukaðri sítrónunni 

500 gr (+/- 50 gr) flórsykur

1-3 msk af mjólk ef þarf 

Aðferð

-takið eina sítrónu, þrífið hana vel undir rennandi vatni og sjóðið í 20 mínútur. Skerið hana í 2 hluta og fjarlægið fræ.

-Maukið sítrónuna í matvinnsluvél, með töfrasprota eða í mixer. Ekki mauka hana alveg, það er gott að hafa örlitla bita ennþá í maukinu.

-Látið sítrónumaukið kólna aðeins áður en því er blandað í deigið. 

-Vigtið og mælið saman öll þurrefni og setjið í skál, bætið saman við þau mjúku smjöri, eggjunum og 2/3 af maukuðu sítrónunni. Hrærið saman þar til að úr verður samfellt deig.

-Setjið í smurð kökuform og bakið svo við 180°C í 30 mínútur eða þar til kakan er stinn í miðjunni og aðeins farin að losna frá könntunum. 

-Látið kökuna kólna alveg áður en þið setjið kremið á

-Þeytið saman smjöri, rjómaosti, sítrónunni og flórsykri. Ef þetta er of þurrt, bætið þá smá mjólk útí blönduna (fer eftir hve safamikil sítrónan er) 

-Setjið á milli og svo ofaná kökuna.  

Punktar

-það þarf ekki endilega að þekja alla kökuna með kreminu. Það er einnig flott að setja aðeins á milli og ofan á toppinn og hafa endana bera svo þeir sjáist

-Þetta er æðisleg kaka til þess að setja í skúffukökuform 

-Góð kaka fyrir páskana og skella smá gulum matarlit í kremið.

njótið! :) 

Vatnsdeigsbollur

Fyrst þegar ég gerði vatnsdeigsbollur var ég við það af fá taugaáfall af stressi yfir bollum sem myndu ekki rísa, eða þaðan af verra. Rísa og falla SVO...

Þetta eru ekki mikil vísindi. Það eru örfá innihaldsefni í uppskriftinni og það er hægt að græja þetta allt í einum potti svo að það þarf ekki að kosta mikið uppvask að gera bollurnar.

Galdurinn við að baka þær er að hafa 200°C heitan ofn, alls ekki kaldari en það, EKKI opna ofninn fyrr en bollurnar eru farnar að brúnast og aðal trikkið er að baka þær NÓGU lengi :)

Að þessu sögðu, þá er aðferðin svona

setjið smjörlíki og vatn saman í pott 

þegar suðan er að koma upp og smjörlíkið er bráðnað, 

Setjið hveiti og salt útí og hrærið saman. Hafið ekki áhyggjur á því ef þetta lítur svona út.

Svona endar deigið eftir smá 

setjið eggin í aðra skál og sláið þau í sundur

Þeytið eggin saman við deigið í 3-4 skömmtum með handþeytara í pottinum þar til deigið er orðið svona 

Mér finnst ágætt að nota sprautupoka (ekki með neinum stút) til að setja deigið á smjörpappír. En það er ekkert mál að gera þetta með 2 matskeiðum 

Spautið deiginu á plötu og hafið ágætt pláss á milli, þær þenjast vel út. Sjáið toppana sem myndast þegar maður sleppir sprautupokanum frá. Það þarf að ýta þeim aðeins niður svo þeir verði ekki of brúnir

Búðingur, karamella, sulta, rjómi og toppunum er dýft ofan í brætt suðusúkkulaði áður en þeim er tyllt ofaná 

Uppskrift
ca 13-15 bollur að meðalstærð

160 gr smjörlíki
4 dl vatn
200 gr hveiti
3-4 meðalstór egg
1/4 tsk salt

Aðferð:
-Smjörlíki og vatn er hitað saman í potti þar til smjörlíkið er bráðið og blandan er komin að suðu.
-Hrærið hveiti og salti saman við með sleif þar til blandan er orðin að samfelldu deigi.
-Látið blönduna kólna í 4-5 mínútur og notist þá við handþeytara og þeytið eggin saman við (sláið þau fyrst í sundur í skál) í 3-4 skömmtum þar til að blandan er orðin að sléttu deigi sem helst vel á skeið.
-Setjið deigið á plötu klædda bökunarpappír með þeirri aðferð sem þið kjósið (sprautupoka með stút eða ekki eða 2 skeiðum) og bakið þetta við 200°C  í 30 mínútur eða þar til þær eru orðnar vel karamellu brúnar að lit (þær eru ekki tilbúnar þegar þær eru að orðnar hálfbrúnar en eru enn ljósar í skorunum, bollurnar þurfa allar að taka á sig lit)
-Sjá tips um hvernig skal baka hina fullkomnu bollu (sem fellur ekki) hér efst :) 
-Látið kólna og setjið fyllingu að vild.

Fylling: 
-Royal búðingur er útbúinn þannig að í duftið er sett um 2/3 af því magni af mjólk sem upp er gefið. Þannig fæst ansi bragðsterkur búðingur sem passar vel á bollurnar. Smyrjið rúmri matskeið af búðing á hverja bollu
-Setjið jarðarberjasultu ofan á búðingsblönduna og að lokum léttþeyttan rjóma.-Tyllið lokinu ofan á og njótið :)Með þessari fyllingu hefur mér ekki þurft vanta eitthvað meira en þetta. Hver á samt sína uppáhalds bollu og það er gaman að breyta út af vananum og prufa nýtt. Hér er ég einungis að koma fram með klassíska gerdeigsbollu

Njótið! :) 

Árdís Rún hafði gaman að Jóa frænda sínum þegar hún var að smakka sína fyrstu bollu 

Gerdeigsbollur á bolludag

Sumir vilja gerdeigsbollur á meðan aðrir kjósa vatnsdeigsbollur.

Sjálf vil ég hafa hvorugtveggja, en það sem fylgir því er töluverður bakstur. Það er samt auðvelt að byrja á að skella í gerdeigsbollur og á meðan þær eru að hefast þá gerir maður vatnsdeigsbollurnar.

Það er svo annað mál hvað fólk kýs að setja á bollurnar sínar.
Mitt uppáhald er jarðarberjasulta, Royal karamellu/vanillubúðingur og rjómi, ég útskýri það aðeins hér neðar hvernig ég útfæri það.

9 bollur, í stærri kanntinum, þetta er 1/2 uppskrift

eftir hefingu nr 2 

það er ekki gott að baka þær of mikið, þær þorna við það

Uppskrift af gerbollum er eftirfarandi (ath að hún er nokkuð stór en lítið mál er að minnka hana um helming, setjið samt áfram 1 egg)


Uppskrift 
(um 18 bollur)
1 kg hveiti
2 pakkar þurrger
2 tsk lyftiduft
120 gr sykur
2.5 dl mjólk
200 gr smjör/smjörlíki
2 dl vatn
1 stk egg
2 tsk kardimommudropar

Aðferð: 
-Öll þurrefnin sett í skál, vökvinn hitaður þar til volgur og smjörið/smjörlíkið bráið, hnoðað
-Látið hefa sig í klst, deiginu er á slegið niður og mótaðar bollur (stærð fer því hve stórar þið viljið hafa bollurnar) og fletjið bollurnar svo aðeins út með lófanum. Þið verðið að gera ráð fyrir að fyllingin muni lyfta bollunni nokkuð mikið svo að það er gott að hafa bolluna sjálfa ekki of háa áður en fyllingin fer í.
-látið hefast á plötunum sem þið bakið bollurnar á, með viskastykki breytt yfir í 30-40 mínútur og bakið svo við 180°C í ca 20-30 mín eða þar til þær eru orðnar létt karamellubrúnar á toppnum.
-Þegar þær eru orðnar kaldar, skerið þær í sundur og dýfið toppnum í brætt súkkulaði eða penslið yfir þær (eða notið teskeið) glassúr að vild (já það er LANG best að skera bollurnar fyrst og setja glassúr/súkkulaði eftirá)

Fylling: 

svona set ég bollurnar saman (það er smá karamella á þeim einnig)

-Royal búðingur er útbúinn þannig að í duftið er sett um 2/3 af því magni af mjólk sem upp er gefið. Þannig fæst ansi bragðsterkur búðingur sem passar vel á bollurnar. Smyrjið rúmri matskeið af búðing á hverja bollu
-Setjið jarðarberjasultu ofan á búðingsblönduna og að lokum léttþeyttan rjóma.
-Tyllið lokinu ofan á og njótið :)
Með þessari fyllingu hefur mér ekki þurft vanta eitthvað meira en þetta. Hver á samt sína uppáhalds bollu og það er gaman að breyta út af vananum og prufa nýtt. Hér er ég einungis að koma fram með klassíska gerdeigsbollu

njótið! :)

Árlegi jólagjafaleikur Ragna.is

Nú, 3. árið í röð ætla ég í samstarfi við Litlu Garðbúðina  að gefa jólagjöf. 

Jólapakkinn verður dreginn út á aðfangadag kl 16 og mun ég reyna að koma honum í hendur þess heppna eins fljótt og ég get. 


Til þess að taka þátt þurfið þið að like-a við Ragna.is á Facebook og skrifa við mynd sem er á Facebooksíðu Ragna.is, svar við þessari spurningu: 
Hvaða eftirrétt hafið þið á jólunum? 

Myndina má finna með þessum link hér 


Facebook síða Ragna.is er hér 

Jólaös

Sæl :)

Ég skil stundum ekki hvernig ég kem mér í þær aðstæður þar sem ég hef ALLT of mikið að gera :)
Eins og staðan er núna (og hefur verið sl mánuð) þá hefur allt verið á syngjandi gangi og nokkrir hlutir hafa setið á hakanum. Eins og þetta blogg til dæmis :)

Ég er auðvitað farin að vinna á fullu á Bráðamóttökunni eins og ég gerði áður en Árdís Rún fæddist og hún er komin til dagmömmu. Ég er einnig töluvert mikið að syngja með Kór Lindakirkju og nýjasta söngviðbótin er Sönghópurinn Harmony sem ég í slagtogi við 2 aðrar gríðarlega góðar söngkonur stofnuðum.

18. desember ætlum við svo að halda tónleika í Lindakirkju sem bera nafnið Harmony í Hátíðarskapi 

Undirbúningur svona jólatónleika krefst mikils tíma og hafa mörg kvöldin farið í æfingar einnig sem við höfum verið að syngja á 1-2 stöðum í hverri viku síðustu 4 vikurnar sem jú tekur sinn tíma líka :)

Í gær söng Lindakirkjukórinn á Jólatónleikum Heru Bjarkar í Grafarvogskirkju og nk sunnudag verður haldið Aðventuhátíð í Lindakirkju þar sem kórinn verður með kraftmikla, fallega og jólalega tónleika.

Eins og þið sjáið hér fyrir ofan eru tónleikarnir okkar svo 18. desember og höfum við ákveðið að gefa allan ágóða af tónleikunum til Barnahúss, en Barnahús er stofnun þar sem tekið er á málum þeirra barna sem verða fyrir kynferðislegu ofbeldi. Þar hljóta þau viðeigandi meðferð í sínum málum og eru mjög mörg mál sem koma inn miðað við þann fjölda sem starfar þar. Stofnuninni var nýlega blessunarlega úthlutað nýju og stærra húsnæði og því nóg sem þarf að gera og veitir ekki af smá auka aur inn í þær framkvæmdir.  

20. desember mun Kór Lindakirkju svo syngja við tónleika Regínu Óskar en nánari upplýsingar um þá tónleikar eru hér 

Það er samt öruggt að jólagjafaleikurinn mun verða eins og alltaf og verður hann tengdur við facebook síðu Ragna.is eins og síðustu 2 jól. Þið verðið því að like-a síðuna Ragna.is til þess að fylgjast með honum :) 

Njótið aðventunnar :) 

með kveðju 

Ragna Björg 

Pönnukökur

Já, þetta eru þessar gömlu og góðu :)

Uppskriftin er að mestu byggð á uppskriftinni að pönnukökum í bókinni hennar Helgu Sigurðardóttur, sem er alger gullnáma varðandi grunnuppskriftir að hinu og þessu :)

Pönnukökur eru alveg ótrúlega góðar, eins einfaldar og þær eru, upprúllaðar með sykri eða með rabbabarasultu og rjóma... mmm! Ég veit að þið næstum lygnið aftur augunum með mér :)

þurrefni sett í skál 

smjörið brætt á pönnunni

auðvelt að mæla 500 ml af mjólk svona :) 

eggjum bætt saman við ásamt smjöri 

deigsoppan á að vera mjög þunn!

ég vil að það komi lítil göt þegar pönnukakan fer að eldast :) 

pönnukakan losu frá brúnunum

snúið við 

ég hvolfi svo pönnukökunum á disk og strái sykur á hverja og eina 

svona geri ég rjómapönnukökur: Set rabbabarasultu á hálfa pönnukökuna

set kúfaða matskeið af rjóma 

brýt pönnukökuna yfir og geri geil með hendinni

brýt pönnukökuna aftur yfir og þá er þetta komið :) 

þessi draumadís var hins vegar ALLS ekki á því að smakka ósykraða pönnuköku... Endaði á að smjatta á banana 

Þessi uppskrift gerir pönnukökur fyrir ca 4, sé ekkert annað meðlæti með.

Uppskrift
250 gr hveiti
1/2 tsk lyftiduft
25 gr smjör
600-700 ml mjólk
2 egg
2 msk sykur
1/4 tsk salt

Aðferð
-Þurrefnum er blandað saman í skál og 500 ml af mjólkinni bætt saman við.
-2 eggjum er blandað saman við ásamt bræddu smjöri (best er að bræða það á vægum hita á pönnukökupönnunni og hella því svo útí deigið)
-Restinni af mjólkinni er hrært saman við
-Tæplega ausu af deigsoppu er hellt á pönnukökupönnuna, upp við brún öðru megin, og svo er pönnunni  hallað til og frá og hrist til þess að dreyfa pönnukökusoppunni yfir alla pönnuna. Persónulega finnst mér best að setja ríflega af soppu og hella svo umfram soppu útí skálina aftur til að nota síðar.
-Pönnukakan er svo losuð frá brúnunum og snúið við og klárað að baka hana þannig.
-Hvolfi svo pönnukökunni á disk og strái sykur yfir

punktar:
-Hér er eiginlega nauðsynlegt að verða sér úti um pönnukökupönnu... Hún þarf kannski ekki að vera þessi gamla íslenska, en einhversskonar pönnukökupanna.
-Hérna er líka eiginlega nauðsynlegt að eiga pönnukökuspaða... Svo hægt sé að ná undir alla pönnukökuna til þess að snúa henni við.
-Það er ekki víst að allir borði rjómapönnukökur, það er því um að gera að vefja upp nokkrar sykurpönnukökur :)


Ef þið eigið pönnukökupönnu þá mæli ég með að þið prufið að gera skonsurnar líka :)


Njótið